Politikki

Parisimi peqqarniisaarniarnerit Vittus Qujaukitsup quarsaarutigai

Nunanut allanut naalakkersuisup Vittus Qujaukitsup Frankrigip illoqarfiisa pingaarnersaanni ippassaq unnukkut qulinngunngitsiartoq peqqarniisaarniartoqarneranut atatilkugu ima oqaaseqaateqarpoq.

Allattoq Camilla Dam

novembarip 14-at 2015 11:12

Nutserisoq Simon Uldum -

- Frankrigimit tusakkat assut aalassassutigaakka. Saassussinerit unnuk manna pisut akuersornanngitsuullutillu ilivitsumik paasiuminaatsuupput.

- Taamak immikkut peqqarniitsigisunik pisoqartillugu inuiaqatigiinnut franskinut inunnullu sussuteqanngitsunut saassussinermut eqqugaasimasunut tapersersuinissarput assut pingaartuuvoq, Vittus Qujaukitsoq tusagassiorfinnut nalunaaruteqarluni taama allappoq.

Aamma atuaruk François Hollande: Peqqarniisaarniarneruvoq

Saassussinerit sakkortunersaat tusarnaartitsisarfimmi Le Bataclanimi amerikamiut rockimik nipilersortartut Eagles of Death Metalip tusarnaartitsinerisa nalaani pivoq. Peqqarniisaarniat pingasut sakkortuumik aallaasersorsinnarlutik imminut qaartipput peqqarniisaarniarlu ataaseq politiinit aallaaneqarluni. Inuit 100-t missaat tassani ajunaarput.

Frankrigimi arsaattarfissuup Stade de Francep silataani, Rue Bichatimi Rue Alibertimilu, Avenue de la Républiquemi, Rue de Charonnemi, Boulevard Voltairemi Rue de la Fontain au Roimilu saassussisoqarnerani inuit 30-t missaat ajunaarput.

Inuit 200-t missaat ikilerneqarsimasut nalunaarutigineqarsimapput, taakkunannga 80-it annertuumik ikiligaasimallutik.

Kalaallit Parisimiittut pilertortumik pisariaqartitsinermi danskit nunarsuaq tamakkerlugu piareersimasutut sullissiviannut oqarasuaatikkut +45 33 92 11 12 / bbb@um.dk attaveqarnissaannut Naalakkersuisunit siunnersorneqarput.