Parisimi isumaqatigiissummi Savalimmiormiut periusaat atorneqarusuppoq

Naalakkersuisut anguniaagaasa pingaarutillit ilagaat nunatta nunat tamalaat, Parisimi isumaqatigiissutaanut ilanngunnissaa. Maannalu tusarniaanerit aallartereerput, Savalimmiormiullu periusaata malinneqarnissaa aamma piareersarneqartutut ippoq.

Naalakkersuisuusimasut 2016-mi qularutigaat, Kalaallit Nunaata Parisimi isumaqatigiissummut qanoq ilanngutsigisinnaanera, tassa Danmarkip pisussaaffiliinerinut sunniuteqanngitsumik ilanngutissaguni, taamaammallu taamani nunarput tamatumunnga tunuarsimaarpoq.

AAMMA ATUARUK Silap pissusaa pillugu USA Kinalu isumaqatigiipput

Savalimmiormiulli ajornartorsiummut tamatumunnga Danmark peqatigalugu aaqqiivoq, aaqqiinerlu taama ittoq tassaavoq Múte Bourup Egedep Naalakkersuisullu sinnerisa atorusutaat.

- Savalimmiormiut periuseq atugaat illuatungeriinnit artukkiissutaasussaanngilaq. Tassa imaappoq, anguniakkatik namminneq aalajangiusimasinnaavaat.  Anguniakkallu taakku Danmarkimut artukkiisussaanngillat aammalu illuatungaanut. Danmarki nammineq pisussaaffeqarpoq, matumani soorlu EU-mut tunngatillugu Savalimmiut artukkerneqartussaanani, taama tusarniaanermi allakkami allassimasoqarpoq.

Nunat tamarmik immikkut anguniakkaminnik anguniagaqarsinnaapput, tassa nunap politikeriisa isumaat naapertorlugu silap pissusia pillugu anguniakkanut tunngatillugu.

Periuseq aallaqqaammut misissorneqanngilaq

Tusarniaanermi allakkiami aamma erserpoq, Naalakkersuisuusimasut Parisimi isumaqatigiissummut naaggaannginnerminni Savalimmiormiut periusaat pillugu misissuisimanngitsut.

Taamanikkummi oqallisaaneruvoq silaannaap mingutsinneqarneranut annikillisaaniartoqarnerani nunatta inuutissarsiornikkut periarfissaasa akornuserneqarsinnaaneri, tassa suliffissuaqarnermut tunngasut oqallinnermi initunerupput silap pissusaa pillugu suliniuteqarnermi allatut iliorluni aallertoqarsinnaaneranut sanilliullugu.

Maannalu tassa Naalakkersuisut periuseq Savalimmiormiut atugaat atorusulerpaat.

- Periuseq taanna nunatsinni siunissami suliffissuaqartitsiniarnermut ineriartortitsinissamut akornutaasinnaanngilaq. Parisimi isumaqatigiissutip ataani nunatta silaannaap pissusaatigut tunniussinnaasai aammalu inuiaqatigiittut silaannaap pissusaa pillugu periusissiamut tunngatillugu, Inatsisartut ima aalajangerput, Parisimi isumaqatigiissummut nunatta tapersiilluni tunniussinnaasai suliarineqassasut, taama tusarniaanermi allakkiami allassimasoqarpoq, imalu itisilerneqarluni:

- Taama suliap aallartinnissaanut atatillugu piumasaqaataanngilaq silap pissusaa pillugu nunarput pinngitsoorani tunniussaqassasoq, illuatungeriittulliuna tamanna suliassaasoq.

Tusarniaanermi allakkiami allassimasoqarportaaq, Naalakkersuisut Parisimi isumaqatigiissut aqqutigalugu nunatta avataaniit aningaasanik isaatitsinissaa Naalakkersuisunit eqqumaffigineqassasoq.

- Parisimi isumaqatigiissuteqarnikkut naatsorsuutigineqarpoq silap pissusaanut attuumassuteqartunik nunat tamalaat fondtitigut aningaasaliinernullu allanut ammaassisoqarnissaa taamaalilluni nunap pissusaanut tunngatillugu tapersiisoqalersinnaammat, taama tusarniaanermi allakkiami allassimasoqarpoq.

Siunniussat periusissiallu qanoq ittuuneri apeqqutaassapput

Inatsisartuni amerlanerussuteqartut aalajangerpata nunarput isumaqatigiissummi ilaassasoq, taava inuiaqatigiittut silap pissusaa pillugu periusissiortoqassaaq anguniagassiortoqassallunilu, taakkulu FN-mut ingerlaavartumik nalunaarusiarineqartalissapput.

Tamannalu aamma suliffeqarfinnut innuttaasunullu sunniuteqalissaaq.

- Inuiaqatigiit iluanni inuutissarsiornikkullu aningaasaqarnerup nammassinnaasai apeqqutaallutik sutigut nunarput silap pissusaatigut tunniussaqarsinnaanersoq aalajangiisoqassaaq. Kalaallit Nunaata nammineq siunniussai inuutissarsiornermi suliallit kommunillu suleqatiginerisigut aningaasaqarnikkut ineriartortitsisoqassaaq, matumani nunatsinni periarfissanut attuumassuteqartumik, tusarniaanermi allakkiaq ilaatigut taama imaqarpoq.

AAMMA ATUARUK Naatsorsuineq nutaaq: Coronamik tuniluunnersuaq piujuartitsisumik nukissiortitsinerulersoq

Taamaammat Naalakkersuisut tusarniaanermi aamma erseqqissaapput, inuussutissarsiornerup iluani inuiaqatigiillu iluani allatigut imaaratarsinnaasoq arlaatigut kingunilimmik attoqillaasoqartoq, tassami nunarput tunniussaqarsinnaatinniarlugu allatut aamma periartoqarsinnaavoq.

Matumanili aamma apeqqutaalluinnassaaq, politikerit Parisimi isumaqatigiissut qanorpiaq atorniarneraat.

- Taamaattumik massakkorpiaq nalileruminaappoq nunatta qanoq anguniagaqarnera apeqqutaalluni inuutissarsiornerup iluani aningaasaqarnikkut allaffissornikkullu sutigut tamanna eqqorneqaataajumaarnersoq. Tassami kingusinnerusukkut silap pissusaa pillugu periusissiortoqareernerani imaassinnaavoq tamanna inuutissarsiornerup iluanut kingunerloratarsinnaasoq.

Naalakkersuisuttaaq nalilinngilaat, Parisimi isumaqatigiissuteqartoqarnerata nassataanik allaffissornermut immikkut aningaasaleeqqittoqassanersoq.

Tusarniaaneq februaarip 23-ianut killeqarpoq.