Paneeraq Siegstad Munk nunatsinni biskopinngorpoq
Sofie Petersenip taartissaa maanna paasineqarpoq. Tassalu Provsti Paneeraq Siegstad Munk qinerneqarnerpaajulluni Kalaallit Nunaata Biskopeqarfiani taaneqartoq biskopitaarineqartussanngorpoq.
43-nik ukiulik Paneeraq Siegstad Munk nunatsinni biskopinngortoq. Taanna Attuminngaanneersuuvoq, Ilisimatusarfimmi teologimi 2001-imi bachelorinngorpoq, teologimi Københavns Universitetiani teologimi 2017-imi kandidatinngorluni.
AAMMA ATUARUK Biskoppissamik qinersinermi akunnattoorfeqartoq: Taasinerit pingasut allakkatigut nassiunneqartut tammartut
Taanna Kalaallit Nunaanni palasitut 2004-miilli sulilerpoq, illoqarfinnilu assigiinngitsuni arlalinni palasiusarsimalluni. Provsteqarfimmilu Kujataani 2017-imi provstinngorpoq.
- Naalakkersuisut Paneeraq pilluaqqungaarpaat, Kalaallit Nunaannilu Ilagiit pillugit suleqatigiinnissaq ineriartortitseqataanermilu suleqatigiinnissaq qilanaaraat, Ilinniartitaanermut, kultureqarnermut ilageeqarnermullu naalakkersuisoq, Karl Frederik Danielsen allappoq.
AAMMA ATUARUK Biskopinngortitsinissaq killiligaanngitsumik kinguartinneqartoq
Naalakkersuisut biskopimut qinersisoqartussanngortoq 3. marts 2020 nalunaarput. Qinigassanngortittullu kingusinnerpaamik qinnigassanngortinnertik juulip arfineq aappaani nalunaarutigissagaat. Biskopinngorniunnissamut qinigassanngortittut sisamat, qinersinermut ataatsimiititaliamit akuerineqartut Biskopeqarfiup allattoqarfiata juulip 22-ani nalunaarutigaa.
Kalaallit Nunaata biskopissaanik qinersisinnaatitaasut septembarip appaani qinersipput. Qinersinermilu amerlanerussuteqartut Paneeraq Siegstad Munk Kalaallit Nunaata Ilagiivisa ukiuni aggersuni ilusilersuilluarnissaa kissaatigaat.
Biskopi nutaaq atorfimmini 1. december 2020 atuutilissaaq, biskopitulli ivertitsinissaq pisarnermisut ingerlanneqarsinnaanngornissaata tungaanut kinguartinneqarpoq.
