Biskoppissamik qinersinermi akunnattoorfeqartoq: Taasinerit pingasut allakkatigut nassiunneqartut tammartut
Nuummi biskoppeqarfimmi kisitsisoqaleruttorpoq. Biskoppissarmi ivertinneqartussaavoq, taasinerlu naammassivoq. Nunatsinnit tamarmik taasinerit ullumi kisinneqartussaapput.
Taasinerilli pingasut amigaataapput. Allakkammi puua taasinernik pingasunik imaqartoq periarfeerunneqarpoq. Allagaq tunumi nunaqarfimmit Isortumit nassiunneqarpoq, Nuummullu nassiunneqarnermini periarfeerunneqarpoq.
Inuit sisamat biskippimut qinigassanngortipput
Kalaallit Nunaanni Ilagiit qullersaanni atuuffimmut inuit sisamat qinigassanngortittut tassaapput:
Kujataani provsti, Paneeraq Siegstad Munk.
Domprovsti Johan Johansen Nuummi najugalik.
Upernavimmi palasi, Hans Jørgen Dinesen
Kiisalu Qasigiannguani palasi Henriette Have.
AAMMA ATUARUK Sassartut sisamaasut: Biskoppissamik qinersineq aallartittoq
- Allagaq nassiunneqarnikuusoq nalunngilarput, allakkalli nassiunneqartut tikinniarnerat sivisusinnaasarpoq, biskoppeqarfimmi aqutsisoq Mariane Hansen Heilmann oqarpoq.
- Allakkap utaqqinissaa aalajangerparput – allagarli ullumikkut suli apuutinngilaq.
Taasinerit pingasut nutaamik taasititsisoqartariaqarneranik kinguneqassanersoq taassuma akerusunngilaa.
Taama maannakkut qanoq iliussavisi?
- Qinersinermut ataatsimiititaliami aqagu ullaakkut ataatsimiittoqassaaq – qanorlu pisoqarnissaa oqaluuserissavarput.
Taasineq septembarip ulluisa aappaanni aallartinneqarpoq.
Biskoppi ukiuni 25-ni atuuffimmineereerluni soraarninngulersoq
Maannakkut biskoppiusoq, Sofie Petersen ukiuni 25-ni biskoppioreerluni soraarninngorniarpoq. Taanna 1995-imi maajip ulluisa 28-anni biskoppitut ivertinneqarpoq.
Biskoppi ilageeqarnermut tunngasuni qullersaavoq. Taamaammat provstinunt, palasinut ilagiillu sinniisaannut nakkutilliineq suliassanut ilaapput.
Tamatuma saniatigut biskoppip palasinngortitsinerit oqaluffinnik atoqqaartitsinerit aamma suliassarai.
Kalaallit Nunaanni iligiinni sulisut biskoppissamik qinersisinnaapput.
AAMMA ATUARUK Biskopinngortitsinissaq killiligaanngitsumik kinguartinneqartoq
- Ilagiinni sinniisut, palasit, ajoqit – palasinut ikiortit ilinniarfimanngitsut atuaasartullu qaammammusiallit qinersisinnaapput, Mariane Hansen Heilmann oqarpoq.
Qinersinerlu aappassaani ajutoornermik eqqugaavoq. Biskoppertaarmi Hans Egedep Oqaluffiani Nuummi novembarip ulluisa 22-anni ivertinneqartussaagaluarpoq, tamannali corona pissutigalugu killilersuinerit pillugit kinguartinneqarpoq.
Biskoppinngortitsisoqaraangat uku naliginnaasumik peqataasaraluarput, Dronning Magrethe, ilageeqarnermut Naalakkersuisoq, nunat avannarliit biskoppii, nunatsinnilu palasit. Coronalli kingunerisaanik katersuussinnaanermut maleruaqqusat maannakkut atuuttut aallaavigalugit kommunit killeqarfiinut allanut angalalluni aaqqissuussinissanut peqataajartortoqaqqusaanngilaq – taamaammat ivertitsisoqarsinnaanngilaq.
