Palasiunerit paavimut tulliusut ilaat: Paavip qimarngusut piitsullu uummateqarfigigai
Paavi Frans ullumi ilisaavoq, palasiunerit paavimut tulliusut ilaat Giovanni Battista Re oqaluussinermini ilaatigut oqarpoq, Paavi Frans “Inuiaat paaviat kikkunnut tamanut inissaqartitsisoq”, katuullit oqaluffiani misigittartuulluni sulisuusoq.
- Inuk kissalaartoq ullutsinnilu unammilligassanut, piffissami matumani paavip Fransip eqqasuutit, naalliuutit neriunnerlu sunniisuusunut malussarissusilerujussuaq.
- Inuit ataasiakkaat inuiaallu toqqaannartumik attaveqarfigisarpai, kikkunnut tamanut qanilaartuunissi pilerisuuaa, pingaartumik ajornartorsiortut eqqumaffiginerusarlugit, palasiunerit paavimut tulliusut ilaat oqarpoq.
Paavi Frans suiaaqatiminnoortut avinnerilluunniit katuullit assuarisuunngilai, katuullillu oqaluffiini kikkut tamarmik inissaqarnerat aalajangiusimasuullugu.
Fransip “oqaluffik kikkunut tamanut angerlarsimaffiusoq, angerlarsimaffik iserfigeriaannaajuaannartoq“ isummiusimavaa, palasiunerit paavimut tulliusut ilaat oqarpoq.
- Oqaluffik inummut kimulluunniit upperisaa inuuniarnermiluunniit tunngaviit suugaluarpata mangiuussinnaasoq, ikiinik mamitsitsisinnaasoq, palasiunerit paavimut tulliusut ilaat oqaluussinermi ilaani oqarpoq.
Paavi qimarngusut, nunasisut piitsullu ikiorniarlugit “kisissaanngitsunik” suliniuteqartarpoq, Giovanni Battista Re oqarpoq.
- Imminut tunniuttarpoq, pingaartumik akornatsinni minnerpaanut pingaanngitsunullu.
Qarmarsualiornani ikaartarfiliortoq
Palasiunerit paavimut tulliusut ilaata paavip qimarngusunut nunasisunullu isumassuisuunera, eqqissinissaq pillugu kajumissaarisarnera silallu pissusia pillugu ilungersuuteqartarnera oqaatigimmagu Romimi Peterspladsenimi Giovanni Battista Rep oqaluussiffiani ersaattaannersuaqarpoq.
Paavip Fransip naggammik inuulluaqqunerani inuit titusintilikkaat takkussuupput.
Taakku ilagaat USA-p præsidentia Donald Trump, paavi Fransip qimarngusunik nunasisunillu pinnittarneranik isumaqatigiinngissuterpassuaqarfigisartagaa.
Rep oqaluussissummini ilaatigut pave Fransip ikaartarfilioqqusineq “qarmarsuunngitsut” inunnut kajumissaarutigiuartagaa oqaatigimmagu Trumpi tusarnaarpoq.
Dronning Mary ilisinermi aamma peqataavoq, ministeriunerli Mette Frederiksen peqataasorpassuit akornanni takussaanngilaq.
Paavi Fransi napparsimareerluni ataasinngormat 88-inik ukioqarluni toquvoq.
