Troels Lund Poulsen Illersornissamut isumaqatigiissut oqallisigiartorlugu Kalaallit Nunaannukalertoq
Illersornissamut ministeri Troels Lund Poulsenip (V) Kalaallit Nunaanni nunanut allanut naalakkersuisoq Vivian Motzfeldt ataatsimeeqatigiartorlugu marlunngorpat Nuummukassaaq.
Taama Illersornissamut ministereqarfik tusagassiutinut allappoq.
Ilaatigut illersornissamut isumaqatigiissut 2021-meersoq “Issittumi piginnaasaqalernissamut isumaqatigiissut”-mik taaguuteqartoq, sumut killinnersoq pillugu oqaloqatigiissutigissavaat
Isumaqatigiissummi ilaatigut issittumi dronit ungasissumut anngussinnaasunut radareqarfinnullu 1,5 milliardit koruunit immikkoortinneqarnikuupput.
2025-li aallartittoq – isumaqatigiissuteqartoqareernerani ukiut sisamat qaangiuttut – isumaqatigiissummi immikkoortut arlallit suli piviusunngortinneqanngillat. Taamak DR aamma Weekendavisen allaaserisaqarput.
Iliuuseqarfigineqarpallaarsimanngilaq
Tamatumunnga tunngatillugu “naalakkersuisut nikerarnerini iliuuseqarfigineqarpallaarsimanngitsoq” Troels Lund Poulsenip nassuerutigaa.
Illersornissami sakkutuut alapernaarsuisinnaanissaannut piginnaanertusaanissamut, annaassiniarnernilu inuit iliuuseqarsinnaanerinut tapersersuisinnaanissaq ilaatigut isumaqatigiissutip imarai.
Nunani pissaanilissuarni soorlu USA-p, Kinap Ruslandillu akornanni Isumannaallisaanermut illersornissamullu politikkimi Issittup inissisimaffiata pingaaruteqaleraluttuinnarnerata nalaani isumaqatigiissutigineqarpoq.
Issittumi nunarsuarmi inissisimanerup soqutigineqaleraluttuinnarnerani, nunap ilaani pisoqarneranut malinnaasinnaanissamut pisariaqartitsineruleriartortoq, partiit 2021-mi isumaqatigiissusiortut isumaqarput.
Kunngi angalaqatigalugu
Ministeri Kalaallit Nunaanni timmisartoqarfinni inoqarfiusuni avannarpasinnerpaamut Station Nordimut pingasunngorpat ingerlaqqissaaq. Taanna Siriusimit atorneqarpoq.
Angalanermi tassani Kunngi Frederik angalaqatigineqassaaq.
Kalaallit Nunaata kangiata avannaani inoqarfiunngitsumi alapernaarsuineq politiillu suliassaat Sirius-patruljep isumagissavai.
Amerikap præsidentiata Donald Trumpip, Kalaallit Nunaannik aqutsilerusulluni soqutiginnilernera pillugu toqqissisimatitsiunnaanerani, qaammatialuit qaangiuttullu Kalaallit Nunaannut tikeraarneq pissaaq.
Kalaallit Nunaata nunarsuarmi illersornissamut tunngatillugu pingaaruteqassusaa sisamanngormat amerikap præsidentiata Donald Trumpip oqaatigeqqippaa.
