Ilisarititsineq: Qatanngutigiit Slettemarkikkut ilisaritillugit
Qatanngutigiit Slettemarkikkut inigisaat pisataqarpallaanngilaq, sisoraatilli aallaasillu takussaapput. Taakku angerlarlutik feeriarput, namminnerlu oqarnerattut unikaallalaarlutik – tassa pisussanut piareersimajumalluni pisimasunik eqqarsaatiginnilaarneq. Tassa pilersaarusiungaatsiarneq.
Sondre aamma Ukaleq Slettemark inip qeqqani sofami kajortumi issiapput. Feeriarnerminni sulerisimanerat eqqartulaarparput.
Ilaqutamaarneq, sisorarluni kangerlummi illuaqqamukarneq, unammiffiusussat tulliinut piareersarneq – aamma nunatsinni uani sapaatit-akunnerani pissartanngorniunnissaq.
”Feeria” soorluuna pikkorissarfiunerorpasittoq. Oqaasera marluullutik illaatigaat. Apersuinissamullu piareerpugut.
Aallarfik
Piffissaq utertilaassavarput. Pisuttalerniaqqaaliinnarnermi sisoraatit siulliit atineqarput, ajugaasalernissarlu taamani takorluugaavoq.
Naartuulernerat aallartissutigeriartigu. Sondre aamma Ukaleq Slettemark marluullutik septembarimi inunngorput. Nalaatsornerinnaanngilarlu – pilersaarusioqqissaagaavormi.
- Septembarimi inunngorpugut, taamaalilluni anaanarput naartugaluarluni unammeqataaginnarsinnaaniassammat. Tassa anaanatta sisoraaserluni ooqattaasartarnera aallaavigalugu pilersaarusiaalluni, Sondre Slettemark illarluni oqaluttuarpoq.
Sisoraaserluni ooqattaasarneq ilaqutariit Slettemarkikkunni qangali pingaaruteqartuaannarpoq – tassami sutigut tamatigungajak. Taamaammat ilaqutariit 2006-imi nunatsinniit Norgemut nuunnerat tupinnarpallaanngilaq, angajoqqaavimi Øystein aamma Uiloq Slettemark OL-imut peqataanissamik taamani anguniagaqaleruttorput.
Ilaqutariit Slettemarkikkut
Ilaqutariit unammiartorlutik angalajuartarmata qatanngutigiit marluk mikillutilli timersortartut pikkorivissortut akornanniileramik suli ullumi taamaapput. Eqqaamasallu ersernerlulaaraluartut sunniuteqarsimapput.
Sondre Slettemark taamani meeraaqigami eqqaamasaqangaanngilaq, sisoraaserlunili oqilaniuttarneq meeraanermini peroriartornerminilu taamaattussaannaasut eqqaamalluarpaa.
- Pisuttaleqqammiinnarluta ujakkaartalerpugut. Meeqqat allat peqatigalugit sisoraaserluta pinnguartaleqqaarpugut. Arriitsumillu siuariartorusaarpugut – siullermik takinerusumoortalerluta, taava sakkortunerusumik sungiusartalerluta, Sondre Slettemark oqaluttuarpoq.
Ukaleq Slettemark Norgemi najugaqarnermi nalaani sisoraaserluni ooqattaasartalerpoq. Angajoqqaavili unammisartuujunnaarlutik qitornatik nunatsinni peroriartortikkusukkamikkit Kalaallit Nunaannut uterput.
Arnaat Uiloq Slettemark inimut pisataqarpianngitsumut kajortumik sofalimmut appakaappoq.
- Naak nipittartoq, arlaata takuaa? arnaat aperivoq.
Nipittartoq aalajangersimasoq ujarpaa. Taanna atorfissaqartippaa, qatanngutigiimmi nukarlersaat Inuk Slettemark sungiusaqatigiartulerpaa. Nipittartoq ujarparput, naninaguli. Taanna aallaammik sisoraatinillu unermilluni nukarliliani aniartoqatigaa, ilatillu´baj´-eerlugit.
Apersuineq aallarteqqippoq. Ukioq 2013-iuvoq, angajoqqaajusullu qitornatik nunatsinni peroriartussasut kissaatigigamikku ilaqutariit tamaanga nuussimalerput.
Pikkorivissiartuaarneq
Ukiulli sisamat missaat qaangiutiinnartut sungiusarluarneq takussutissartaqalerpoq, ilaqutariillu Norgemut nooqqipput, tamatumuuna Ukaleq Slettemarkip angorutaa pillugu.
- Kalaallit Nunaannut uteratta sungiusarnerput ingerlatiinnarparput, unamminernut peqataasarluta aavartarlutalu. Taassuma kingorna Norgemi timersortartut kakkannersiukkat ilinniarnertuunngorniarfiat Geilomiittoq qinnuteqarfigaara, taanna oqaluttuarpoq.
Akuerisaavorlu. Taava ilaqutariit poortueqqipput, 2017-milu Norgeliaqqillutik. Avatangiisit sungiusimasat qimallugit nutaarluinnarmut nuunneq.
- Uteqattaarluni nuuttarneq imaannaannguilaq, Ukaleq Slettemark oqarpoq.
Nutsertuartarneq Sondre Slettemarkimut sunniuteqarujussuarsimanngilaq. Taassuma misigisarpassuani ikinngutigilikkanilu nuannaruutigai.
Nunatsinniit nuussimanngikkunik pikkorivissortut akornanniilersimanavianngikkaluarnertik marluullutik isumaqatigiissutigaat. Taama pikkoritsigilissagaanni pisariallit maani piunngillat, Norgemilu sungiusaqatigisinnaasaat amerlaneroqaat. Siuariartornerannullu iluaqutaasimaqaaq.
Pikkorivissortut akornanni
Suut tamarmik pilersaarusioqqissaagaarpasilerput-aasiit. Erninerit, nutsernerit, unikaallanneq, pikkorissarneq aamma ikinngutit sisoraaserlutik ooqattaasartartut. Soorluli pullartap iluaaniiginnarnerarpakka. Qatanngutigiit illalaaqqipput, paasinneqqissaarlutilli anngaallutik.
- Pikkorivissortut akornanniinneq pullartamiinnertut oqaatigineqarsinnaavoq. Tunniusimasorujussuit akornanniiffiuvoq, sunalu tamangajammi sisoraaserluni ooqattaasarnermut, sungiusarnermut aamma napparsimalernaveersaarnermut tunngavoq, Ukaleq Slettemark oqarpoq.
Naak ikinngutitik tamarmik sisoraaserlutik ooqattaasartuunngikkaluarlutillu ujakkaartartuunngikkaluartut, taamaattoq amerlanerit timersortartoqatigigitik marluullutik oqarput.
- Toqqagassat assigiinngitsuupput. Ilinniarneq aamma festerneq toqqarneqarneq ajorput. Allat iliuuserisartagaat toqqarneqarneq ajorput. Allanik suliaqarluni qanoq nuannertigissagaluarnera soorunami ilaanneeriarlunga eqqarsaatigisarpara, Sondre Slettemark oqarpoq.
- Angusakka naammaginngikkaangakkit taakku eqqarsaatiginerusarpakka. Piumassuseerukkaangama taama eqqarsarnerulertarpunga. Eqqarsaatigivallaarnaveersaartarparali.
Iliuuserisimanngisaminnilli peqqissimissuteqarnerlutik?
Akissutaalli paatsuugassaanngilaq: naamik.
Apuuffik
Siunissaq pillugu naggataagut aperivunga. Tassa ukiut 20-t qaangiuppata qanoq inissisimanissartik takorloorneraat. Sumiissavisi? Septembarimi aamma ilissi meerartaassavisi?
Sondre Slettemark eqqarsalaariarluni akivoq:
- OL-imi angusarissaarluarusuppunga, kalaallillu amerlanerusut angusaqarnerorusulernerannik malitseqassasoq neriuutigaara. Misileerusussuseqarnissaq. Imminut upperinissaq – immaqalu nunarsuarmi pitsaanerpaanngorluni.
Ukaleq Slettemark aqqalussami oqalunnerani anngaavoq.
- Kalaallit Nunaanniinnissara naatsorsuutigaara. Immaqa sungiusaasuullunga imaluunniit nunanut allanut unammisartunut sungiusaasutut – nuannerunarteqaara, taanna oqarpoq.
Kinguaariillu nutaat takkutinnginnerini nunatta erfalasua OL-imi namminneq nittarsaassinnaassallugu marluullutik neriuutigaat.
Soorunalumi aamma nunarsuarmi sisoraaserluni ooqattaasallaqqinnerpaanngornissaq.
