Sondre Slettemarkip nunarput sinnerlugu unamminini tulluusimaarutigaa, OL-imullu peqataanissani takorloorlugu

Ullaakkut nalunaaqutaq 8.00 sungiusarneq, kingorna atuariarneq ualikkullu sungiusariaqqinneq.

18-inik ukiullip, sisoraaserluni ooqattaasartartup, Sondre Slettemarkip ukiap ingerlanerani inuunera taamatukanneq ingerlavoq. Tamatuma saniatigut unamminerit assigiinngitsut peqataaffigai.

Inuusuttoq sisoraaserluni ooqattaasartartoq, Norgemi timersortartut pikkorissut ilinniarnertuunngorniarfianni 3.G-mi ilinniartoq sukataangaatsiarpoq. Taanna kingullermik unamminermini sisoraaserluni ooqattaasarnermi Sloveniami, Tysklandimi Italiamilu januaarimi World Cupeqarnissaanut annguppoq.

Angusarissaarluaraluarlunili unamminernut peqataaniarnani aalajangerpoq, taassumami ilinniarnertuunngorniarnini salliunniarlugulu unamminissat allat aggersut pingaarnerutinniarlugit aalajangerpoq.

- Angorusutakka angugakkit nuannerpoq, kisianni maanna aallaqattaarnissaq ajornakusuulaassaaq, Sondre Slettemark oqarpoq.

Taassuma sisoraaserluni ooqattaasarnermi piffissami kingusinnerusumi World Cupimut angussinnaanissaminut periarfissaqarumaarluni ilimagivaa.

- Maanna angusinnaagukku taava kingusinnerusukkut aamma angusinnaassavara. Ukiulli tulliani qanoq innera unamminerillu tulliuttut soorunami apeqqutaassapput, kisianni periarfissaqartoq nalunngilara, Sondre Slettemark oqarpoq.

Sisoraaserluni ooqattaasarneq salliutikkaa

Sondre Slettemark Uiloq aamma Øystein Slettemarkip aamma inuuniutigalugu sisoraaserlutik ooqattaasartuusut erneraat, taassumalu qatanngutaata Ukaleq Slettemarkip sisoraaserluni ooqattaasarneq aamma inuuniutigaa.

Sondre Slettemarkili aperigaanni tamatuma toqqarnissaa tassunga pissusissamisoornersoq akissutaa qularnakuluppoq.

- Taamaattuaannanngikkaluarluni taamaalivoq. Nammineq toqqaasinnaallunga misigisimajuaannarpunga, kisianni sisoraaserluni ooqattaasarneq nuannermat toqqarpara.

Sisoraaserluni ooqattaasarneq inuunerani pingaarnerusoq oqaloqatiginerani aamma ersarilluarpoq.

- Sungiusanngikkaangama qasuersaaginnartarpunga. Sisoraaserluni ooqattaasarnerup saniatigut annerusumik soqutigisaqarpallaanngilanga. Taannami nuannarivara. Soqutigisarinerpaagiga oqaatigineqarsinnaavoq, taanna oqarpoq.

Takorluukkani annerpaaq

Sondre Slettemark tullissaani januaarimi Norges Cupimi aamma Junior VM-imi peqataassaaq, taakkunanilu sapinngisamik angusarissaarluarnissani takorloorpaa.

Takorluugaa anneq siunissami ungasinnerulaartumiippoq.

- OL-imut peqataanissaq angusarissaarnissarlu takorluugaraara. Taanna piffissamut ungasinnerusumut takorluugaani annerpaagunarpoq. Soorunami aamma nunarsuarmi pissartanngorniunnermut peqataanissaq. OL-imi VM-imilu angusarissaarluarnissaq takorluugariuaannassagunarpara, Sondre Slettemark oqarpoq.

Sondre Slettemarkili sisoraaserluni ooqattaasaraangami allamik aamma pingaartitaqarpoq. Tassa nunarput sinnerlugu takutitsinissaq.

- Danmark imaluunnit Norge sinnerlugu unammeqataanani Kalaallit Nunaat sinnerlugu peqataaneq uannut nuannerpoq. Kalaallit Nunaanni peroriartorpunga, kalaaliusorujussuartullu misigisimavunga. Kalaallit Nunaat sinnerlugu peqataasinnaanera tulluusimaarutigaara.