Uiloq Slettemark OL-eqataajumavoq

-Nunarsuarmi tamarmi sisorarluni ooqattaasarnermi unammeqataasaqqilerniarpunga, taamaammallu anguniarpara aappaagu 2010-mi Vancouverimi OL-eqarnissaanut peqataanissamut anngunniarnissara. Uiloq Slettemark oqarpoq.
Allattoq Najaaraq Egede
juunip 22-at 2009 06:45

- Sinnattoriuaannarpara OL-imi peqataanissara, kisianni inuususseruttorlunga pissatseruttorama Dansk Olympisk Komitép piumasaqaatai sakkortoorujussuupput, piumasaqaatit ullumikkutut ittuuppata 2002-mi 2006-imilu peqataasimassagaluarlunga. Tamanna artorsaatigisarpara, taamaammat OL-imut tullermut anngunniarsuaarniarpunga, Uiloq Slettemark oqarpoq.

Uiloq Slettemark timigissartuarluni qasujaallisarlunilu ukiorli sungiusalerpoq, aamma Team Grønland-ip nalunaarfigereerpaa OL-imut anngunniarnissaanut tapersersussallugu.

- Januaarimi World Cupimut anngukkamali OL-imut peqataanissara sinnattorilerpara. Assut anngukkusuppunga, tassaalerniassagama sisorarluni ooqattaasartartuni kalaaleq arnaq OL-imut peqataasoq siulleq. Angussaqqaarpara, ooqattaasartartoq angusaqarusuttoq oqarpoq.