Pave Frans 88-inik ukioqarluni - toquvoq

Katuullit oqaluffiata qullersaa, pave Frans toquvoq.

Pave 88-inik ukioqarluni poorskip ulluisa aappaani ullaakkut toquvoq.

Vatikanet videokkut nalunaaruteqarluni paasissutissiisoq, Reuters allappoq.

- Romimi biskoppi, Frans ullaaq nalunaaqutaq 07.35 ataatami angerlarsimaffianut uterpoq, kardinal Kevin Farrell oqarpoq.

Napparsimanermi nalaani naggammik inuulluaqqussuteqartoq

Pave Romimi Peterspladsimi takkussimasunut tusindilikkaanut poorskimi inuulluaqqussuteqarnerluni sapaammi tamanut erserpoq.

- Angutit arnallu qatanngutikka poorskimi pilluaritsi, pave aneersuartarfimmit oqarpoq.

Pave napparsimarulunnerminit aniguiniartoq takkuttunut anillassanersoq tassani ilisimaneqanngikkaluarpoq.

Pave Fransip USA-p præsidentiata tullersortaa, J.D. Vance Vatikanetimut sapaammi pulaartoq aamma naapippaa.

Pave inuunerminut aarlerinartumik puallunnini pissutigalugu februaarimi marsimilu sapaatit akunnerini tallimani napparsimmavimmi uninngavoq, uninnganeratalu nalaani toqussangatinneqarmat katsorsaanerup unitsinneqarnissaa nakorsat isumaliutigaat.

Pave Frans inuttut Jorge Mario Bergogliomik ateqartoq, Argentinami inunngorpoq Amerikallu kujataamiunit paveni siulliulluni.

Pavip eqqaamaneqarnera

Pave Frans pavetut 2013-mi marsip 13-iani toqqarneqarpoq.

Taamani oqaluffimmut meeqqanut kinguaassiutitigut naapertuilluanngitsuliortoqarsimaneranik suliap tusaamaneqarnerata aamma Vatikanimi pissaaneqarniuttoqarnerata nalaani atuutilerpoq, taassumalu meeqqanut naapertuilluanngitsuliornerit akiorniarneqarnissaanut ”aalajangersimasunik suliniuteqarnissaq” neriorsuutigaa.

Naapertuilluanngitsuliornerit akuersaanngilluinnarpai, taassumalu "palasit naapertuilluanngitsuliorsimasut palasiuinnarsinnaassanngitsut" aalajangersimasumik oqaatigalugit, CNN allappoq.

Pave Fransip katuullit oqaluffiani qullersaanermi ilarujussuani Vatikanetimi katuullit paveni ileqquusoq malillugu kisimiilluni qaqortunik atisaqanngilaq.

Taassuma taarsigaa, Benedikt 2022-mi toqunissi tikillugu pavet ilisarnaatigisaannik qaqortunik atisaqartarpoq.

Pave Frans kardinalit, pavessamik toqqaasussat, 80 procentingajaannit toqqarneqarnikuuvoq.