Palasit juullip nalliuttuini kinaassuseerutipajaarlutik ulapputtaqisut
Biskoppi Paneeraq Siegstad suleqatinilu maanna ulapputileruttorput. Juullimi naalagiarnissat oqaluusissallu piareersarneqarput.
- Pingaartumik illoqarfinni anginerusuni ulapittaqaagut. Ulapittangaarattami kinaassuseerutipajaarluta ulapittarpugut, taanna oqarpoq.
Paneeraq Siegstad
Paneeraq Siegstad Munk, 44-nik ukioqarpoq, Attumeersuullunilu. Taanna decembarip aallaqqaataani 2020-mi biskoppitut ivertinneqarpoq.
Taassuma paarlaappaa Sofie Petersen, taamani Kalaallit Nunaanni Ilageeqarfimmi ukiuni 25-ni biskoppioreersoq.
Paneeraq Siegstad Munk Ilisimatusarfimmi upperisarsiornermi 2001-mi bachelorinngorpoq, upperisarsiornermilu kandidatinngorniarnini Københavnip Universitetiani 2017-imi naammassillugu.
Nunatsinni palasitut sulianiarnini pissutigalugu kandidatinngorniarnini 2004-mi unitsikkallarpaa.
Palaseqarfinni sulisut tassaasarput ajoqit, palasit pattattullu – ullullu makku ulapinnerpaaffigisarpaat. Paneeraq Siegstad Munk naapertorlugu sivikitsuinnarmik nerinissamut periarfissaqartarput. Juullimimi naalagiarnermi oqaluussissutissaq pingaarnerpaavoq:
- Juullimut oqaluusissat tussiutissallu oktobarikkunnili eqqarsaatigilereertarpagut, juullimmi ulluini eqqissinartumi ilaquttatsinnut aamma piffissaqassagutta piareersarluagassaapput. Kisianni aamma toqqissinartuuvoq inuit ileqqut sungiusimasaat avaqquppallaarnagit ingerlasussaagatta, najukkami ileqqut aallaavigalugit tussiutillu pingaartinneqartarput, taanna oqarpoq.
Kisimiilluni juullisiortoqarsinnaavoq
Juulli assigiinngitsorpassuarnik misigissuseqarfiusinnaasarpoq. Ilaasa asasatik ilagisarpaat, ilaalli ungasissumiittut kisimiittarput.
Taamattali ataatsimoorsinnaannginnerput ajortutut isigisariaqanngikkipput kisimiillunilu jullisiorluartoqarsinnaasoq biskoppi isumaqarpoq:
AAMMA ATUARUK Biskop-inngortitsineq: Paneeraq Siegstad Munk pingajussaanik iluatsitsivoq
- Juulli ilaqutariinni ataatsimoorfissatut takorloortarparput, taakku ataatsimooqatigisinnaanngikkaangatsigit imminut anaatartutullusooq inissittarpugut.
Imminullu nalligaluni inissittoortoqarsinnaasarpoq, tamannali mianersuuttariaqarparput.
- Kisimiikkaluarluni aamma tipaatsuttoqarsinnaavoq, imaanngilarmi kikkut tamatta ilaqutarpassuaqartugut kisianni eqqissilluni atoraanni peqqissiminartuliornanilu aamma siunissap qaammariartornera ilutigalugu eqqarsaatit tujorminartuniippata nuannersumut saatikkutsigit kisimiikkaluarluta juulli eqqissinartumik atorsinnaavarput.