Biskop-inngortitsineq: Paneeraq Siegstad Munk pingajussaanik iluatsitsivoq

Ullumi Nuummi biskop-inngortitsinermi dronningi kalaallisoorpoq.

Kalaallit Nunaanni Paneeraq Siegstad Munk-imik biskop-inngortitsineq siorna novembarip 22-anni pisimasussaangaluarpoq. 

Aggustillu aallaqqaataanut kinguartinneqaraluariarluni – ullumikkut pisussanngortinneqarluni. 

Novembarimi aggustimilu corona tuniluutilertarmat, killilersuuterpassuit atuutilerput – tamakkualu ilagaaat inuit 20-t sinnerlugit katersuuteqqusaajunnaarnerat. 

Tassa pingajussaannik aaqqissuussiniarneq iluatsimmat, Nuummi Hans Egede-p Oqaluffiani Paneeraq Siegstad Munk ullumi biskop-inngortinneqarpoq.

 

Ass.: Malik Brøns

Tamatumanilu dronningi peqataavoq. Oqaluffimmi siorlerpaamiit biskop-inngortitsineq malinnaaffigaa. 

Biskop-inngortitsineq ilageeqarnermi pisartut pingaarnersaasa ilagaat, ileqqorlumi malillugu persuarsiornermi, Danmarkimi biskop-it arfinillit Savalimmiunilu biskoppi peqataapput. 

 

Ass.: Scanpix

Paneeraq Siegstad Munk, 44-nik ukioqarpoq, Attu-meersuullunilu. Siorna biskop-inngortinneqartussamik qinersisoqarmat taagorneqarnerpaavoq, 2020-milu 1. decembari biskop-itut inissilluni. Taassuma paarlaappaa Sofie Petersen, taamani Kalaallit Nunaanni Ilageeqarfimmi ukiuni 25-ni biskop-ioreersoq.

2001-mi Paneeraq Siegstad Munk Ilisimatusarfimmi upperisarsiornermi bachelor-inngorpoq, 2017-imilu upperisarsiornermi kandidat-inngorniarnini Københavnip Universitetiani naammassillugu.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl