Paavi utoqqatseriartorluni Canadamut tikittoq
Ilagiit katuullit siuttuat, paavi Frans, atuarfippaalunni angerlarsimaffiutigisuni ajortuliortoqartarsimanera pillugu utoqqatseriartorluni Canadamut ippassaq sapaammi tikippoq.
Atuarfiit angerlarsimaffiutigisut taakkua ilagiinnit katuullinit 1831-miit 1996-ip tungaanut ingerlanneqartut ajortuliorfiusarsimanerat pillugu assuarineqaqaat.
Canadamimi nunap inoqqaaviisa kulturiat inerteqqutigalugu taakkua meerartaat nunat killiit kulturiannut naleqqussarniarlugit atuarfinni taakkunani atuartinneqarsimapput.
Meeqqat taakkua ilarpassui ilaquttaminnit avissaartinneqarlutillu kaatsitaasarsimapput. Meeqqallu taakkua ilaat aamma timikkut anniartitaallutillu kinguaassiuutitigut atornerlunneqartarsimapput.
Issiaviit innaallagiallit nammineq sanaat
Naggueqatigiit inuit First Nationsit Métisillu meerartaasa atuarfinni angerlarsimaffiutigisuni katuullinit ingerlanneqartuni ajortuliorfigineqartarsimanerat nunap inoqqaavisa aatsaat 1993-imi ammasumik oqallisigisalerpaat.
- Niviarsiaqqanik nukappiaqqanillu ukiukitsunik pinngitsaaliinerit, meeqqanik issiavinnut innaallagialinnut nammineq sanaanut aalajangersuilluni pillaanerit, qanoq qisuariarnissaat paasiniarlugu kaatsitsinerit, ilitsoqqussaralugu oqaatsinik inerteqquteqarnerit kulturiannillu inerteqquteqarnerit pisarsimapput. Ajortuliarpassuupput, KNR-ip Canadami ilanngutassiortua Marianne Stenbæk oqarpoq.
- Ajortuliallu kinguaariinnut tullernut ingerlaqqittunik kingunerluuteqaataapput. Pisullu taakku Canadap nunasiaateqarnermik oqaluttuarisaanerani alianarnerpaanut ilaapput.
AAMMA ATUARUK Canadami inuit 751-it saarnginik nassaartoqartoq
Nunap inoqqaavisa amerlasuut ulloq ukiorpassuarni utaqqisartik persuarsiorfigaat. Allalli naammaginngilaat.
Inuit siuttuata ilaat, Piita Irniq, aqqanilinnik ukioqarluni mattuttumit arnamit pinngitsaalineqarluni kinguaassiuutitigut atornerlunneqarsimavoq. Utoqqatsernerlu naammanngitsoq, taanna KNR-imut oqarpoq.
- Iliuuseqavinnissaat takuniarparput, taanna oqarpoq.
Meeqqat 1300-nit ikinnerunngitsut saarnginik nassaartoqartoq
Issittullu kippasissuani Inuviaaluit ilaat aamma taama isumaqarput. Pisimasullu kinguaariinnut arlalinnut kingunerlutsitsisut pillugit pisussaaffiliisumik arlaatigut neriorsuuteqartoqanngippat, Inuviaaluit paavi naapikkusunngilluinnarpaat.
Ilagiinni katuullini biskoppit Canadami ajortuliornerit pillugit siorna septembarimi utoqqatserput, paavilu maanna aamma utoqqatserluni.
Meeqqat tuusintilikkuutaat katuullit atuarfiini angerlarsimaffiutigisuni taakkunani toqutaasimasorineqarput. Meeqqat 1300-nit ikinnerunngitsut saarngi Canadami atuarfiit angerlarsimaffiutigisimasut taakkua silataanni ilerrini nalunaaqutserneqarsimanngitsuni 2021-mi maajimili assaanerni nassaarineqarput. Ilaatigut tamanna ilagiit katuullit utoqqatsernissamik tamatuma kingorna kimigiiserfineqarujussuarnerannik kinguneqarpoq.
Paavi Maskwacisimi Edmontonip kujataatungaani kilometerit 100 missaanni ungasitsigisumiittumi inunnut 15.000-it missaanniittunut oqalugiassaaq. Canadami atuarfinni angerlarsimaffiutigisuni atuartuusimasut tusarnaartunut ilaassapput.
