Nunanut allanut unammisartut sapinngisartik tamaat atorpaat: Østrig ilungersorpoq
Nunanut allanut unammisartut sapinngisartik tamaat unammipput, piffissanilu sivisuuni Østrigimeersut ilungersungaatsiartillugit.
Unammineralli Østrigimeersut 43-23-mik ajugaanerannik naammassivoq.
Naak kalaallit pingasoriarlutik ajorsaraluarlutik nunanut allanut unammisartut Stavangerimi sapinngisartik tamaat unammipput – taamaammat nunanut allanut unammisartut nukissaqarluarnerat unammillersinnaalluarsinnaassuseqarnerat illersuisullu aallaqqaataanit naammassinissaata tungaanut illersuilluarnerat uummaterpassuarnik ajugaaffiuvoq.
Nunanut allanut unammisartut sapinngisartik tamaat unammisut
Josefine Gadgaardip ingerlatsilluarnera pissutigalugu nunanut allanut unammisartut aallartilluarujussuangajapput, arsarli isinngitsoorpoq.
Østrigilu taamaalilluni siulliulluni isertitsivoq.
Ivaana Holmimulli tunniussilluartoqarneratigut unammisut 1-1-erput.
Østrigimiilli unammisartut kingunitsianngua saassussinerminni tulleriinnik isertitsipput, taamaalillutillu 3-1-imik siuarlutik.
Siuarujussuanngillalli. Andrea Heilmannimmi arsaq isertitsimmagu 3-2-rput.
Nunanut allanut unammisartut allarteqqinnermi misileeqqipput. Østrigimeersulli saassussinernut unitsitsipput, arsarlu isertitsiffissamut inuttaqanngitsumut ajornaatsumik isertittarlugu, taamaalillutik minutsit qulit qaangiuttut 7-2-imik siuarput.
Anders Friis unikkallartitsippoq, aallarteqqikkamillu Sandra Rothberg isertitsivoq, 8-4-lerlutillu.
Nunanut allanut unammisartut Østrigimiut illersuisuisa nukittuut akornisigut misileraaginnavillutik 13-10-ginnarmik nikingalerput, Østrigimillu nunanut allanut unammisartuisa sungiusaasuat unikkallartitsivoq.
Nunanut allanut unammisartut sapinngisartik tamaat unamminermi siullermi atorpaat.
Annaassilluarnerpassuit, illersuilluarnerillu taamatullu saassussilluarnerpassuit.
Unamminerup immikkoortuata siulliup naammassinerani Østrig 20-13-imik siuaqqavoq.
Unamminerup aappaata aallartinnerani Nivi Petersen ungasianiit isertitsivoq.
Unamminerup aappaata aallartinneranit minutsit tallimat qaangiuttut nunanut allanut unammisartut Østrigip saassussineranut illersuilluarlutik Nuuna Lukassenimut arsaq tunniulluarneqarmat 17-24-raartillugit isertitsivoq.
Kalaallit Nunaanneersut kusanarluinnartunik isertitseqattaarput. Siullermik Ivaana Holm målmandi qarsullugu isertitsivoq, kingornalu Lykke Frank Hansen ungasingaatsiartumit isertitsilluni.
Ivalu Bjergilu illersuisut qaangerlugit kalaallit isertitsinerisa 20-ssaat isertippaa, taamaalillutik 20-29-mik inissisimalerlutik.
Unamminerup immikkoortuani siullermitulli nunanut allanut unammisartut unammilluarput, tamannalu pissutigalugu Østrigimiut nunanut allanut unammisartui ilungersortillugit,
Østrigimeersulli saassusseqqikkaangami navianartarpoq, taamaammat unammineq 43-23-mik inerneqarpoq.
