Kong Frederiup Dronning Maryllu nunarput nuannarilluinnarpaat

Kunngikkormiut ullut arfineq-pingasut Qaanaamiit kujavarterlutik Narsamut angalareerlutik, arfininngorneq Julip ulluisa arferngani Narsarsuarminngaanniit angerlarput.

Kunngikkormiut illoqarfiit nunaqarfiillu qulit tikippaat. Qitornatik marlulissat Prinsesse Josephine aamma Prins Vincent angalanerup ilaani ilagivaat.

Kunngikkormiut naammatsinngillat, tikeqqinnissaminnut pileripput.  

- Assorsuaq nuannerpoq. Piffissap sivikitsup iluani pisorpassuupput, tikeraarnerpullu uanga isumanni sivikippallaarpoq. Tikitagut arlallit sivisunerusumik najorusunnaraluarput, isikkiviit takorannertut, pinngortitarlu tupinnartoq unganarput. Nunamut maanga qangali tiguartinnikuuvunga. Ataqqinartorsuaq Kunngi Frederik qulingat taama oqarpoq.    

Ataqqinartoq Dronning Mary uimisuulli aamma nunatsinnut misigissusaai assingupput.

- Manna misigisassanik periarfissarpassuarpoq, tulliani pinngortitamiinnerorusuppunga. Pinngortimaniinneq nuannarilluinnartuuara, eqqissineq nuannaarnerlu pinngortitamiikkaangama misigisarpakka, oqaatigineqarsinnaavorlu Kalallit Nunaata pinngortitaa nunarsuarmi tupinnarnersaat ilagigaat. Dronning Mary oqarpoq.

Kunngikkormiut nunarput nuannarilluaraat

Kunngikkormiut tikilluaqqusaalluarlutik misigisimapput.   

- Suut tamarmik nuannertorujussuupput. Nuannersumik tikilluaqqusaanerput, Uiga Kunnginngorneranut uangalu Droninnginngorninnut atatillugu pilluaqqusisorpassuarnut attortisimaaqaagut. Nuannaarpugut tulluusimaarlutalu Kunngeqarfik sinnerlugu tikeraarsinnaagatta. Kalaallit Nunaat Qallunaat Nunaallu immikkut pingaarutilimmik atanerput naqissuserparput. Dronning Mary oqarpoq.

Ataqqinartorsuaq Kunngi Frederik Katuami nerersuaqatigiinnermi sisamanngormat oqalugiarami, kunnginngornissaminut piareersarnermini nunarput pingaaruteqarsimasoq oqalugiutimini ilannguppaa.  

Oqalugiutini aallartippaa aperaluni nunamut asannilertoqarsinnaanersoq, imminullu taalluni, uppernasaataalluni ilumut nunamut inuiannullu asannilertoqarsinnaasoq. Maanna Dronning Mary apersorneqarami nunatsinnut aamma asannilersimalluni oqarpoq.

- Kalaallit Nunaannut, kalaallinullu asannilerpunga. 

Piniartutut inuuneq

Kunngi Frederik arlaleriarluni nunatsinniittareernikuuvoq. 2000-mi qimusserlutik ilisimasassarsiortunut peqataavoq, tassanilu qaammatit tallimat nunatsinniippoq.

Taamanikkut angerlalerluni, kisimiilluni piniartutut inuunissaminut piareersimalluni oqarsimavoq. Taamatullu oqarnera apersorneqarami apeqqutigineqarpoq. 

- Kiffaanngissuserujussuaq taamani misigaara. Tupinnartuuvoq misigisaq. Piniariarfiit, inuit ukiorpassuarni piniariartarfii takullugit. Piniartut puisinniaraangamik sumi pisaqarsinnaanerlutik, siuaaminniit ilisimasat kingorngussimasatik ingerlateqqikkaat takuakka. Kunngi Frederik taama oqarpoq.

Kunngi Frederik amma Dronning Mary-p angajulliliaai Kunngissaq Christian, Prinsesse Isabella-lu nunatsinnut angalaqataanngillat. Kunngissaq Christian Junip ulluisa 24-ani ilinniarnertuunngorpoq.  

- Tulluusimaarpunga tamaani angerlarsimasutut misigisinnaagama, nuliaralu meeqqagullu tikilluaqqusaanerput assut qujamasuutigaarput. Ilorrisimaaqaagut, tikilluaqqusaasutullu misigaluta. Kunngi Frederik oqarpoq.

Kunngikkormiut pisortatigoortumik tikeraarnerat Junip ulluisa 29-ani Qaanaami aallartittoq, Qassiarsummi arfininngormat julip ulluisa arferngani naammassivoq.