Peqataarngaartoq: Ingasannerpaavoq

Kalaallit nunanut allanut unammisartut Korea Kujallermut unamminerminni aqqanilinnik ajorsaraluarlutik nikalluutiginngilaat.

- Misigisarput ingasaqaaq, tullussimaarpugut, Nukaaka Lyberth unammereernermini taama oqarpoq.

Taassumunngami unammineq pingaartuuvoq, nunanummi allanut unammisartutut peqataarngaarnermini isertitsivoq.

Unammeqataalu Sandra Rothberg titarnerup killinganiittartoq nuannisarpoq.

- Ingasassuaarpoq, misigisassatsialassuuvoq, oqaasertaleruminaapporluunniit, unamminermi sisamaraartoq Sandra Rothberg oqarpoq.

Nuannaarutaali isertitsinerinnaanngilaq.

- Inuuissiorpunga allanik kissaateqanngilanga, attortisimaqaluni oqarpoq.

Unammereernermi oqaluttarfilianernimini nuannaartorinnittai inuusiortoorlutik erinarsorput.

Kalaallit nuannaartorinnittut unamminernut isiginnaariartartut tapersersuillaqqinnerpaasut, unamminermik aaqqissuisunit maannamut illersuillaqqinnerpaasuusut oqaatigaat.

- Tapersersorneqarnerput assorujussuaq pingaaruteqarpoq, tamannalu malugilluarpaarput, uatsinnullu isumaqaqaaq. Sandra Rothberg oqarpoq.

Ilimangisaannit pitsaaneruvoq

Nunanut allanut unammisartut Korea Kujallermutt unamminerminni isertitsinissaminnut periarfissaqarluarput. Unamminerup nalaani Korea Kujallermiut sukkangaluaqisut kalaallit qeqqani arsartatut assersuilluarnertik tulluusimaarutigaat.

- Qeqqani arsartartut pitsaaqaaq, unamminitsinni oqaloqatigiilluarnerput nukittorsaatigilluaqaarput, Nukaaka Lyberth oqarpoq nangillunilu:

- Ilimagisatsinniit ajunnginneruvoq. Korea kujallermut isertitanik isiikaniliinnarnik ajorarsaratta.

Kalaallit Nunaanni innuttaasut 56.000-iinnaapput, Korea Kujallermi 52 millioninit innuttaasoqartoq. Immikkut maluginiangassaavoq nunat annertussusaat eqqarsarsaatigissangaanni isertitatigut isikkaniliinnarnik nikingapput.

- Naatsorsuutiginikuuarput unnammilluassalluta unali tupaallannartuuvoq nunamut angisuumut Korea Kujallermut unammisartorissaartumullu nallersuussinnaangatta.