Nunanut allanut unammisartut Korea Kujallermut ajorsartut

Assammik arsartartut nunanut allanut unammisartuisa periarfissarpassuit annaavaat, illersuisullu Korea kujallermiunut sukkasuunut arlaleriarlutik assersuilluarlutik. Tamannali naammanngilaq.

Korea Kujallermeersummi 27-16-imik ajugaapput.

Arsaq isertikkuminaatsoq

Saassussinermi siullermi målip killinga aporfiupput, Korea Kujalliullu saassussineranik kinguneqarluni. Ivaana Holmilli saassussisoq unitsippaa, tamannalu timersortarfimmi illersuisut qiimmatsannermik suaartartillugit.

Korea Kujallermersulli isertitsillattaalerput 1-0, 2-0 aamma 3-0 tamatumalu saniatigut kalaallit unammisui marluk minutsini marlunni anisitaallutik.

Minutsit arfineq-marluk qaangiuttut qiimmatsattoqarluarpoq. Sandra Rothbergilli arsaq isertippaa 1-4-lerlutillu.

Illersuisut arsaq tamarmik illersorluaqattaarpaat, nunanullu allanut unammisartugut saassussinernik aqutsilluarsinnaalerlutik, minutsit 15-it qaangiuttut 8-5-eqqalerput.

Korea Kujallermiulli siuariartoqqilerput, nunanullu allanut unammisartut sungiusaasuat, Anders Friis Korea Kujalleq 11-5-imik siaqqasoq katersuutsitsivoq.

Nina Lorentzen Aviaaja Heilmannimit taarserneqarpoq, sekundillu arlaqanngitsut qaangiutiinnartut unamminermi siullermik annaassivoq, arsarlu pakkersimaarlugu.

Nunanut allanut unammisartut periarfissanut pitsaanut arlalinnut unammilluarput, arsalli isertinniarnera ajornarluni.

Unamminermi unikkallarnermi Korea Kujallermeersut 15-6-imik siuaqqalerput.

Tusaamasaq aappaluttulerneqartoq

Unamminerulli immikkoortua siulleq annilaarnartumik naammassivoq. Korea Kujallermiummi tusaamasartaata, Eun-Hee Ryup Aviaaja Heilmann straffekastimi niaquatigut eqqorpaa, taamaattumillu toqqaannartumik aappaluttulerneqarluni.

Taamaammat Korea Kujallermiut tusaamasartartik ilaanngitsoq unamminerup aappaa tamaat unammipput.

Aviaaja Heilmann uninnermisulli aallartippoq, arsamik annaasseqqippoq, saassussinermilu Sascha Zeeb isertitsilluni.

Naalli aallartilluaraluarlutik nunanut allanut unammisartut anngukkiartulinngillat. Unamminerup aappaata aallartinneranit minutsit qulit qaangiuttut Korea Kujallermiut 20-9-mik siuaqqapput.

Sandra Rothmannilu tassanngaannaq marlunnik sukkasuunik isertitsivoq. Isertitsinerata aappaa namminneq aallartiffimminnit Korea Kujallermiut måliannut inoqanngitsumut isertippaa.

Angummanniarneralli iluatsinngilaq, unamminerlu 27-16-imik ajorsarnermik inerneqarpoq.

Naalli unamminermi ajugaasoqanngikkaluartoq nunanut allanut unammisartunut illersuineq takuneqarsinnaalluarpoq. Isertitsinerit, annaassinerit allatullu pitsaasumik iliuuseqarnerit tamarmik illersuisunit qiimmatsaatigineqartarlutillu erinarsortoqartarpoq, taakkulu allanit tamanit nipitunerullutik.

Aaqqissuisut aamma tamanna maluginiarluarpaat, kalaallillu illersuisui unammisaqattaarnerni illersuisuni pitsaanerpaanerarpaat.