Oqaaseqartartoq Korea Kujallermut unammineq sioqqullugu – Ajugaanissaq upperisariaqarparput
Ullumikkut ulloq unammiffiuvoq.
Nunatta assammik arsarlutik nunanut allanut unammisartui Korea Kujallermeersullu Stavangerimi DNB Arenami nalunaaqutaq 15:00 unammissapput.
Isumalluarsinnaalereersugullu timersornermi oqaluttuusartut marluk Noah Mølgaard Danny Brandtilu isumaqarput.
Nunanut allanut unammisartut kingullermik VM-ertoqarnerani pissartanut Norgemut ajorsaraluarlutik takutitaat pitsaasorpassuaqarpoq:
- Isertitat taakku aqqanillit nuannaarutigisariaqarpagut, minuttit siulliit 17-it minnerunngitsumillu minuttit kingulliit marluk måliniittorput Nivi Fly tassani takutitsilluaqimmat. Iluatsilluartutut taasinnaasarput tassaavoq utaqqisinnaassuseqarluni arsarneq, Noah Mølgaard oqarpoq, nangillunilu:
- Pisariaqanngitsunik kukkusoqanngilaq. Periarfissat takkutivinnissaat utaqqilluaqattaarparput.
Oqaluttuusartoqataalu nunanullu allanut unammisartuusimasoq, Danny Brandt isumaqataavoq:
- Ivalu Bjerge eqqaaneqanngitsoorsinnaanngilaq. Taassumami presserinera utaqqisinnaassusaalu periarfissarpassiarnik tunisivoq, Danny Brandt oqarpoq.
Nunatta unammisartui aallartilluartut, ullumi unammisassaasa Korea Kujallermiut VM-imi unammeqqaarnerat pitsaanerpaanngitsoq, taakku marluullutik isumaqarput.
Korea Kujalleq pakatsisoq
Korea Kujallermiut Østrig unammigamikku 29-30-mik ajorsarput. Unammilerlu naligiiffiusimarpasissinnaagaluatoq, Korea Kujallermiut arsarnerat pikkugisassanngilaq.
- Sydkoreap unamminermi siullermi takutitaa pakatsinarpoq. Unammillerneqarsinnaalersimapput, Noah Mølgaard oqarpoq.
Nunattali nunanut allanut unammisartui suli sukataartariaqarput.
Korea Kujallermiillu arsartartoq ataaseq Østrigimik unamminermi aqqanileriarluni isertitaqartoq immikkut maluginiagassaavoq.
- Isumaqaraluapugut arsartut pingaarnersaattut inissisimassasoq, Sydkoreameersoq Ruy. Taanna imatorsuaq takusaqarfiginngilarput. Taamaattoq ilia normu 22-mik kiatilik Bitna Woo, taassuma periartuusaartarneri assorsuaq sukkapput. Taakku arsartut marluk unitsissinnaagaanni kalaallinut sunniuteqarluarsinnaavoq, Danny Brandt oqarpoq.
Periarfissaq aaku
Oqaluttuusartut marluk nunatta unammisartuisa ullumi qanoq iliorsinnaanissaat Korea Kujallermiut Østrigimiullu unammineranni maluginiarpaat.
- Sydkoreakkut angisoorsuunngillat, taamaattumik taanna atorluartariaqarparput. Aamma silataaniit måleriarsinnaasoqarpoq, assersuutigalugu Lykke Frank Hansen. Taassuma una unammineq inuunermini aatsaat taama unammilluartigaluni atorumaaraa.
- Taavalumi aamma iligisaasa tamarmik kukkunerit ikinnerpaatillugit arsarluarnissaat pisariaqarpoq.
- Aammalu qeqqaniittuusut arsarneq aqulluarlugu utaqqisinnaassuseqarluarlutik ingerlassinnaassagaat.
Nunanullu allanut unammisartut arsarluarpata, isumalluartoqarsinnaassaaq:
- Arsarluarsinnaagunik Sydkoreamut ajugaasinnaasut ilimagilluinnarpara, Danny Brandt oqarpoq.
Angusaqarluarsinnaanermillu isumaqartuni kisimiinngilaq:
- Ajugaanissaq upperisariaqarparput, Noah Mølgaard oqarpoq.
Unammineq KNR1-ikkut toqqaannartumik aallakaatinneqassaaq.
