Frankrigip ministeriunera tunuarniartoq – Macronilli tunuaqqunngikkaa
Frankrigip ministeriunera, Gabriel Attal Frankrigimi inatsisartunut sapaammi qinersinerup kingorna soraarniutiminik nalunaarutiginnikkiartorluni Parisimi illussaarsuarmi Élyséemi præsidentip allaffianut ataatsimiigiarpoq.
Soraarniutaali franskit præsidentianit, Emmanuel Macronimit akuerineqanngilaq. Taassuma Attal Frankrigimi ”patajaannermik qulakkeerininninnissaq” pissutigalugu atuuffimmiiginnarallaqquaa.
Nutaarsiassaqartitsivik AFP taama allaaserisaqarpoq.
Gabriel Attal Macronip siuttuuffigisaani Ensemble-alliancemi ilaasortaavoq.
Tunuarniartoq
Attalip tunuarniarnini sapaammi unnukkut nalunaarutigaa. Tamatuma saniatigut ”pisussaaffimminit pisariaqartitsisoqarneratigut” atuuffimminiiginnarnissani erseqqissaatigaa.
Taassuma taama nalunaaruteqarnera qinersivinni naliliinernut qisuariaateqarneruvoq, taakkumi Ensemble Inatsisartuni amerlanerussuteqarnavianngitsoq takutippaat.
Akerlinganillu saamerlerneerusut Den Nye Folkefront (NFP) Underhusimi 182-inik qinigaatitaqarluni amerlanerpaanik qinigaatitaqartussaarpasippoq.
Ensemble franskit nunamut imminermut ministereqarfianit naatsorsuinerugallartut naapertorlugit 168-inik qinigaatitaqartussaarpasippoq. Tamanna pissutigalugu centrumalliance Underhusimi partiini anginerpaat tulliusussanngorpoq.
Naatsorsuinerillu malillugit parti National Samling 143-inik qinigaatitaqartussaarpasilluni.
Qinersinermi inernerit naammassinerat suli saqqummiunneqanngillat.
