Oquk pissutaalluni Nanortalimmi palaseqanngitsoq
Nanortallip palaseqarfia piffissami sivitsortumi palaseqarnanilu ajoqeqanngilaq.
Upperisamik naalagiartarnermillu pingaartitsisuulluni palasi ajoqilu amigaataasut kipiluttunartuusorlu, Nanortalimmiut ilaat oqarpoq.
Taakkuami pingaarutilinnik suliaqartartut, Nanortalimmiut isumaqarput.
Ivalo Petersen palaseqalernissaanik neriuuteqartunut ilaavoq:
- Neriuuteqarnaqaaq una ukiaq eqqarsaatigalugu nalliuttorsuit takkutingajakkamik qaammatit marluk missaat qaangiuppata, neriunnaqaaq peqalernissaa erniinaq.
Amigaatigineqaqisut - ingammik sapaatikkut
Nanortalimmiut ilaat Ivalo Petersen sapaatikkut nalliuttunilu oqaluffimmi naalagiartarnermik pingaartitsisut ilagaat.
- Naalagiartarpugut sapaatikkut, taanna oqarpoq.
Nanortalimmi palasi illoqarfimmut allamut siorna nuummat suli ulloq manna tikillugu palaseqanngilaq.
Ajoqilu illoqarfimmut allamut aasap ingerlanerani nuummat, Palaseqarfik Nanortalik ulloq manna tikillugu palaseqarnanilu ajoqeqanngilaq.
Ilagiit sinnisaanniit sapaatikkut naalagiartitsisoqarsinnaasaraluartoq, Nanortalimmiut amigaateqartutut misigisimasut, Ivalo Petersen oqarpoq:
- Amigaatigineqaqaaq, taavalu aamma katittuni, ullorsiorfinni, kuisitsitsinermi sapaatikkuinnarlu aamma naalagiartarnermi amigaataavoq, taanna oqarpoq nangillunilu:
- Pingaartitsisuugatta naalagiartarnissamut upperisamullu, malugeqaarput tamatta, kipiluttunaqaaq.
Oqummik eqqugaanera pissutaasoq
Nanortalimmi ukioq ilivitsoq sinnerlugu palaseqannginnerani palasip illuata oqummik eqqugaaqanera pissutaasunut ilaasoq, Juaanna Platou oqarpoq:
- Palasip illua iluarsaanneqaraluarami oqummik nalaataqarfiulluni. Tassa iluarsaaneqarnikuugaluarpoq, kisianni massakkut suli atorsinnaangikkallarluni.
Oqaluffimmi katittoqassatillugu apersortittoqassatilluguluunniit taakkua palasimit isumagineqartussaammata, Qaqortumi palasi provstilunniit Nanortalimmukartarput. Toqusoqarsimatilluguli ajoqi ilisisinnaasarmat Tasiusami ajoqi Nanortalimmukapallassinnaasartoq, Juaanna Platou erseqqissaavoq.
Juaanna Platou oktobarip qaammataata aallartinnerani Nanortalimmukassamaarpoq, tassanillu iliuuserineqarsinnaasunik ujartuissalluni oqarpoq. Nanortalimmiinermini palasip illoqarniarnera arlaatigut aaqqiivigisinnaassallugu neriuutigaa.
- Pissutsit iluarseriarpata soorlu illorsuaq, imaluunniit inissap tungaatigut iluarsiisoqariarpat aamma taanna neriuutiguilluinnarlugu ingerlajumaarpugut. Aaqqiisoqarumaartoq neriuppunga, aamma taanna siunertarigatsigu.
