Tusagassiuut: Biskopip viinnilerlugu nerisat 1400 koruunillit oqaluffimmut akilertikkai
Kalaallit Nunaanni biskoppi Paneeraq Siegstad Munk nereqatigiissitsinini akisuut oqaluffimmut akilertittarsimavai. Taama Danmarkimi tusagassiuut Radio4 allappoq.
Paneeraq Siegstad Munk ilaatigut provstit ataatsimiinneranni Sarfalimmi nerisassat misilitassat tallimat, viinnit misilitassat tallimat tiitorfinnullu marlunnut kaffi/tii katillugit 2820 koruunillit mamarsaatigisimavai. Inummut ataatsimut 1410 koruunillit.
Radio4-ip allagaatinik takunnissinnaatinneqarneranit ilanngussat tamanna takutippaat.
Ingerlatsinermik inatsisinut professori Aalborg Universitetimilu Juridisk Instituttimi pisortap tullia Sten Bønsing naapertorlugu pisortani atorfeqartut suliffimmi aaqqissuussinerni aningaasat atorneqarsinnaasut biskoppimit atorneqarsimasunit appasinnerujussuupput.
- Piumasaqaatit malinneqarsimarpasinngillat, Sten Bønsing Radio4-mut oqarpoq, naliliillunilu inummut ataatsimut nerisat 1400 kr.-qarnerat “qaffasittorujussuusoq.”
Biskoppeqarfimmi allaffimmi pisortaq Mariane Hansen-Heilmann Radio4-mut oqarpoq, nereqatigiinnernut suliffeqarfiup iluani najoqqutassanik nassaarsinnaasimanani nerinermulli nammineq peqataaffigisaminut akiligassaq qaffasippallaartoq isumaqarluni. Tassani inummut ataatsimut nerisat 1085 koruuneqarput.
– Unikaallatsitsivunga. Taamak akisutigissanngillat, Mariane Hansen-Heilmann Radio4-mut oqarpoq.
Nereqatigiinnerit Mariane Hansen-Heilmannimit peqataaffigineqartoq 2021-mi suleqatigiit nereqatigiinnerat biskoppimit, provstimit sulisunillu tatigisanit tallimanit peqataaffigineqarpoq. Inuit arfineq pingasut tamarmik immikkut sisamanik nerisaqarput 690 koruunilinnik. Ilutigitillugu rødviinnit Merlot puiaasat marluk, hvidviinni ataaseq 820 koruunilik kiisalu puiaasaq ataaseq Pol Roger Rich-champagne 885 koruunilik.
Akiligassat katillugit 8680 koruunit.
Biskoppi Radio4-mut akissuteqarluni naatsumik allappoq biskoppeqarfimmi allaffimmi pisortap oqaaseeqaataanut ilassutissaqarnani.
– Hendes ord er bispeembedets kommentar, skriver Paneeraq Siegstad Munk til mediet.
KNR-imit Paneeraq Siegstad Munk oqaaseqartinniarneqarsimagaluarpoq.
