Eqqartuussisoq: Oqanngisaannassaanga paatsooqatigiittoqarneq ajortoq
Taamaattumik eqqartuussivinni nutserisarneq oqalutseqartarnerlu pitsanngorsarneqassasut, Ilisimatusarfiup Inuillu Pisinnaatitaaffiinut Institutip nalunaarusiaminni siunnersuutigaat.
Birgit Skriver Kalaallit Nunaanni Eqqartuussivinni eqqartuussisuugallartuuvoq.
Taassumalu nutserisut oqalutsillu pikkorissut sulinermini naapittarlugit oqaatigaa.
Oqalutsilli piginnasai nammanngikkaangata eqqartuussinermi peqataasut allat ikiuuttarput, tamanna nutsereqatigiittarnermik taaneqartarpoq.
Inuit tamarmik kukkusarput
Tamannalu unammillernartoqarsinnaasarpoq:
- Oqanngisaannassaanga paatsooqatigiittoqarneq ajortoq, tassami inuimmi tamarmik kukkusinnaapput. Tamannalu pinaveersaartinniarlugu eqqartuussineq sinaakkusersorluarneratigut anguniarneqartarpoq. Soorlu kigaannerusumik sulinikkut aammalu kukkunissap minnerpaaffissaaniitilerlugu atugaqartitsinikkut.
Ilisimatusarfiup Inuit Pisinnaatitaaffiinut Institutip ilaatigut ima inassuteqarput:
• Nutserisussanik piaartumik inniminniisarnerup annertunerpaamik ingerlanneqarnissaa Kalaallit Nunaanni Eqqartuussiviup qulakkiissagaa.
• Oqaasiliortut taaguutinik allattuivik atuuttoq nutartissagaat inatsisilerinermilu taaguutit nutaat siunissami ingerlaavartumik akuerisassagaat.
• Suliami sapinngisamik marlunnik oqalutseqartarnissaa eqqartuussiviit isumagissagaat, pingaartumik suliani sivisuumik ingerlanneqartuni.
• Eqqartuussivinni atorneqarsinnaasunik tunumiut oqaasiinik avannaamiullu oqaasiinik atuisinnaasunik paasinnissinnaasunillu aalajangersimasunik atorfilinnik oqalutseqarnissaa imaluunniit aalajangersimasunik immittakkanik nutserisoqarnissaa Kalaallit Nunaanni Eqqartuussiviup qulakkiissagaa, immaqa nutserisut aalajangersimasumik atorfillit tunumiut avannaamiullu oqaasiinik ilinniarteqqinnerisigut.
Najoqqutarisaq: KALAALLIT NUNAANNI EQQARTUUSSIVINNI NUTSERISARNEQ – Ilsisimatusarfiup Inuit Pisinnaatitaaffiinut Institutillu nalunaarusiaat
Tamannalu eqqartuussisumut akisussaafferujussuuvoq. Paatsooqatigiittoqassanngippallu apereqqinnikkut erseqqissaasoqartartoq, Birgit Skiverip oqaatigaa.
- Arlaatigut nalornissuteqaraanni tunuarsimaannginnissaq pingaaruteqarpoq. Soorlu aperaluni: Imatut oqarputit, iluamik paasivara?
Inatsisitigut innarlitsaaliuinissaq
Oqaatsit pingaarutillit nutserneqassappata unnerluunneqartup inatsisitigut qanoq iliornikkut innarlitsaaliorneqarsinaava?
- Sumiorpaluutit peqqutaallutik attaveqatigiinniarnikkut arlaatigut unammillerneqartoqaraangat inatsisitigut innarlitsaaliuinissaq anguniarlugu aaqqiissutissanik pitsaanerusunilk ujarlertarpugut.
Nalunaarusiami "Kalaallit Nunaanni Eqqartuussivinni Nutserisarneq"-mik taaguuteqartumi pineqaatisiinneqarsimasut, eqqartuussisut, eqqartuusseqataasartut, unnerluussisut illersuisullu nutserinerup pitsaassusaa nalilersorpaat.
Eqqartuussinermi suliaqartartut 94 %-iis parnaarussallu 78 %-iisa nutserisarneq naammaginartutut, ajunngitsutut pitsaalluinnartutulluunniit nalilersorpaat.
Apeqqut: Eqqartuussinerni nutserisoqrfiusuni peqataaffiginikusanni nutserinerup pitsaassusia ataatsimut isigalugu qanoq isumaqarfigaajuk?
|
|
Pineqaatissinneqarsimasut |
Eqqartuussisut,eqqartuusseqataasartut, unnerluussisut illersuisullu |
|
Naammaginanngilaq |
10 % |
1 % |
|
Pitsaanngilaq |
18 % |
6 % |
|
Naammaginartumik pitsaassuseqarpoq |
40 % |
50 % |
|
Pitsaavoq |
13 % |
36 % |
|
Pitsaalluinnarpoq |
25 % |
8 % |
Najoqqutaq: "Kalaallit Nunaanni Eqqartuussivinni Nutserisarneq" - Ilisimatusarfik, Inuit Pisinnaatitaaffiinut Instituti