Oqaluttuarisaanermi pisimasunik qulaajaaneq mamianartuliorfiusimasoq maanna aallartittoq

Isornartorsiuisoqartareersoq, mamianartuliorfiuneranillu allaaserinnittoqartareersoq, nunatta Danmarkillu akornanni ukiuni 80-ini oqaluttuarisaanermi pisimasunik qulaajaaneq maanna aallartittoq Ilisimatusarfiup nalunaarutigaa.

Allattoq Markus Valentin

septembarip 03-at 2025 11:07

Nutserisoq Ivik Kristiansen

- Ilumut mamianarpoq.

Inatsisitigut ataataqanngitsut ilaat, Klaus Frederiksen, DR-imut maajimi taama oqarpoq.

Oqaluttuarisaanermi politikkikkut aalajangiinerit pisimasullu nunatsinnut nunattalu inuinut kingunerlutsitsisimasut qulaajaaffigineqarnissaat 2022-mi juunimi akuersissutigineqarpoq.

Aamma atuaruk Ukiut pingasut qaangiuttut: Oqaluttuarisaanermik qulaajaanissaq suli aallartinneqanngilaq

Aningaasalli immikkoortinneqareerarluartut, ilisimatusartoqatigiillu qulaajaasussat toqqarneqareeraluartut, qulaajaaneq aallartissimanngitsoq DR maajimi allappoq.

Suliamili maanna allariartoqarpoq.

Qulaajaanermi aallartittoq Ilisimatusarfiup nalunaarutigeqqammerpaa.

NUNATTA DANMARKILLU OQALUTTUARISAANERANNIK QULAAJAANEQ

Nunatta Danmarkillu sorsunnersuaq kingullermiit maannamut oqaluttuarisaaneranni pissutsit qulaajarneqassapput. Ilaatigut kalaallit inuinut kingunerluutaallutik Danmarkip politikkikkut aalajangiiffigisimasai qulaajarneqassapput. Soorlu sumi inunngorsimaneq tunngavigalugu akissaasersuinermut, nunatsinni najugaqarfinnik inuerutsitsinermut kalaallillu meerartaannik meerarsianngortitsinermut tunngasuusinnaapput.
Ukiuni tallimani qulaajaasoqassaaq.
Danmarkip naalakkersuisui 45 millionit koruuninik tamatumunnga aningaasaliipput.
Ilisimatusartoqatigiit aqutsisussaannik ukiup massuma naanerani toqqaasoqassaaq, toqqarneqartorlu ilisimatusartoqatigiittussanik nunatsinneersunik Danmarkimeersunillu toqqaassaaq.
Nunatta inui Danmarkillu inui oqaloqatiginerisigut qulaajaanermi ilaatinneqassapput. Tassa ilisimatusartoqatigiit inunnik oqaloqateqariartorlutik qulaajaanerminni aamma.

Najoqqutaq: Danmarkip ilinniartitaanermut ilisimatusarnermullu ministereqarfia (aaqq., Uddannelses- og Forskningsministeriet)

Allisiguk

Saammaateqatigiiffissanngortoq

Oqaluttuarisaanermi qulaajaanermi suna siunertarineqassanersoq pillugu nunatsinnit Danmarkimiillu isumaqatigiittoqarpoq. Nunatta Danmarkillu akornanni ukiuni 80-it kingulliit missaanni oqaluttuarisaanermi eqqunngitsuliornerit tamarmik saqqummiunneqassapput.

Pisimasut pillugit ataatsimut paasinnilluartoqarnissaa saammaateqatigiinnissamullu tunngavissiisoqarnissaa aamma anguniarneqartut Ilisimatusarfimmit tusagassiuutinut nalunaarummi allaqqavoq.

Aamma atuarukNunatta Danmarkillu akornanni oqaluttuarisaanermi pisimasut pillugit ilisimatuussutsikkut misissuisussat toqqagaasut

Nunatta Danmarkillu akornanni oqaluttuarisaanermi pisimasunik qulaajaanerup paaseqatigiinnissamik sunniuteqarnissaa neriuutigalugu, Ilisimatusartoqatigiit qulaajaasussat aqutsisui marluusut, Tenna Jensen Daniel Thorleifsenilu oqarput.

- Maniguulluta suliatigullu peqqissaarussilluta suliassaq aallutissavarput - neriuutigaarpullu paaseqatigiinnissamut aamma assigiinngisitaarnerusumik oqaluttuarisaanermik pilersitsisoqarnissaanut sulinerput tapersiiumaartoq, taakku oqarput.

Nunatta Danmarkillu akornanni ukiuni 80-ini kingullerni oqaluttuarisaanermi pisimasut ukiuni tallimani qulaajaaffigineqarnissaat pilersaarutaavoq. Qulaajaaffiginissaalu akisussaafferujussuusoq, ilisimatusartoqatigiinnut aqutsisut ilisimavaat.

- Piffissaq Kalaallit Nunaannut Danmarkimullu isumaqarsimaqisoq pillugu ilisimasanik nutaanik pilersitsinissaq pingaaruteqarlunilu tamatumunnga akisussaaffik annertuvoq, aqutsisut tusagassiuutinut nalunaarummi oqarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.