Nunatta Danmarkillu akornanni oqaluttuarisaanermi pisimasut pillugit ilisimatuussutsikkut misissuisussat toqqagaasut

Qulaajaasut nalakkersuinikkut aalajangikkat pisimasullu pingaarnerit, nunatta ineriartorneranik taavalu nunatta Danmarkillu akunnerminni pissusiannut sunniisuusut misissussavaat.

Allattoq Christine Hyldal

februaarip 20-at 2024 09:38

Nutserisoq Jens Thorin

Oqaluttuarisaanermik ilinniagartuut marluk Daniel Thorleifsen aamma Tenna Jensen qulaajaarnermi, nunatta Danmarkillu akunnerminni pissusiannik misissuiffiusussami, siuttuussapput.

Naalakkersuisut tusagassiutinut taama allapput.

Qujalanermi naalakkersuinikkut aalajangiinerit pisimasullu pingaarnerit, nunatta ineriartorneranik aamma nunatta Danmarkillu akunnerminni pisusiannik sunniisuusut imaluunniik kalaallit nunaata inuinut kinguneqartut misissorneqassapput.

Nunatta Danmarkillu 2023-mi juunip 22-ani isumaqatigiissusiornerminni tamanna isumaqatigiissutigaat.

Daniel Thorleifsen Nunatta Katersugaasivissuata allagaateqarfiatalu pisortaraa, Tenna Jensenilu Ilisimatusarfiup ataani Issittumi Atugarissaarnermik Ilisimatusarfimmi aqutsisutut atorfeqarluni.

Tenna Jensen aamma spiralilersuisimaneq pillugu suliamut qulaajaanermut aqqutsisuuvoq.

NUNATTA DANMARKILLU OQALUTTUARISAANERANNIK QULAAJAANEQ

Nunatta Danmarkillu sorsunnersuaq kingullermiit maannamut oqaluttuarisaaneranni pissutsit qulaajarneqassapput. Ilaatigut kalaallit inuinut kingunerluutaallutik Danmarkip politikkikkut aalajangiiffigisimasai qulaajarneqassapput. Soorlu sumi inunngorsimaneq tunngavigalugu akissaasersuinermut, nunatsinni najugaqarfinnik inuerutsitsinermut kalaallillu meerartaannik meerarsianngortitsinermut tunngasuusinnaapput.
Ukiuni tallimani qulaajaasoqassaaq.
Danmarkip naalakkersuisui 45 millionit koruuninik tamatumunnga aningaasaliipput.
Ilisimatusartoqatigiit aqutsisussaannik ukiup massuma naanerani toqqaasoqassaaq, toqqarneqartorlu ilisimatusartoqatigiittussanik nunatsinneersunik Danmarkimeersunillu toqqaassaaq.
Nunatta inui Danmarkillu inui oqaloqatiginerisigut qulaajaanermi ilaatinneqassapput. Tassa ilisimatusartoqatigiit inunnik oqaloqateqariartorlutik qulaajaanerminni aamma.

Najoqqutaq: Danmarkip ilinniartitaanermut ilisimatusarnermullu ministereqarfia (aaqq., Uddannelses- og Forskningsministeriet)

Allisiguk

Marlunnik peqquteqartumik kinguartoortoq

Naalagaaffinngornissamut Nunanullu allanut Naalakkersuisoq Vivian Motzfeldt aamma Ilinniartitaanermut Ilisimatusarnermullu ministeri Christina Egelund qulaajaanermi siuttussanik toqqaasuupput.

- Aqutsisussanik toqqaanermi oqaluttuarisaanermi qulaajaanissap aallartinnissaanut qilanaarpugut. Aqutsisussat oqaatsitsinnik, oqaluttuarisaanitsinnik ilisimatusarnermillu ilisimasaqarluartuupput aammalu piffissaq qulaajaaffigineqartussaq inuiaqatigiinni peqataaffigisimallugu, Vivian Motzfeldt oqarpoq.

Christian Egelund aamma nuannaarpoq:

- Peqatigiilluta maanna misissuinissamut aqutsisussanik toqqaasimagatta assut nuannaarutigaara. Daniel Thorleifsen Tenna Jensenilu toqqarneqarnerasigut Kalaallit Nunaanni tunngaveqarluartumik, suleqatigiinnik nukittuunik pilersitsisoqarpoq, taakkulu annertuumik ilisimatuussutsikkut suliniutinik aqutsinermik kiisalu ilisimatusarnermik siammarterinermik misilittagaqarlutik. Qulaajaanermi sulineq pingaarutilik maanna aallartivissinnaanngormat qilanaarutigaara, taanna oqarpoq.

Qulaajaanermi siutuusussat 2023-p naannginnerani toqqarneqarsimasussaagaluarput.

Vivian Motzfeldtip oqarnera naapertorlugu kinguatoorneq marlunnik peqquteqarpoq:

ilisimatusartoqatigiit aqutsisussaattut innersuunneqartunut atatillugu kalaallit tungaanniit qularutiginnittoqarsimavoq.

- Innersuussutaanikuusimasunut apeqqusiineq pinikuulluni, annertuumik kissaatigineqarnikuulluni uagut tungitsinninngaanniit siuttutut inissisimasup aappaa uagut nammitsinnik toqqagassaq tassaassasoq oqaatsitsinnik atuisinnaasoq aammalu oqaluttuarisaanermi qulaajagassatsinni piffissap taassuma iluani ilisimasaqarluartoq aqqusaagaqarsimasorlu, Vivian Motzfeldt KNR-ip radiokkut aallakaatittagaanut Inuiaat Tillernerannut oqarpoq – siuttuusussatulli innersuussaasup aqqa taanagu.

Politikerit qulaajaanermi aqutsisup atasiunissaa aallaqqaammut kissaatigigaluarpaat, piffissalli ingerlanerani marluusussanngorput.

Aamma oqaluttuarisaanermik qulaajanermik akisussaaffik 2023-mi septembarimiit ilinniartitaanermut naalakkersuisumiikkunnaarluni naalagaaffinngornissamut nunanullu allanut naalakkersuisoqafimmiilerpoq.

Naalagaaffinngornissamut Nunanullu allanut Naalakkersuisoqarfiup naalakkersuisut piffissami tassani nikitsiternerannut atatillugu ilisimatusarneq suliassaqarfittut tigumagu tamanna pivoq.

Naalakkersuisut qallunallu naalakkersuisui oqaluttuarisaanermik qulaajaassallutik 2022-mi isumaqatigiipput.

Qujaaajaanissamik suliakkiutip oqaasertai juunimi 2023-mi piareerput.