Inatsisartutut qinigassanngortittut Ilulissani Atuarfik Mathias Storchimi sapaatiummat qineqqusaarnerat KNR TV- radiokkullu aallakaatinneqarpoq.

Oqallinnerup kingornalu Siumumi siusinnerusukkut partiimi allattaanikoq, 2023-mili Oceans North Kalaallit Nunaanni pisortaasoq, innuttaasut apeqqutigisimasaat inuiaqatigiinnut tamarmiusunut samminnginnerullutik inuit ataasiakkaat pillugit amerlanerusimasut naliliivoq.

Qineqqusaarnerulli ingerlariusaa ajorisassaanngikkaluartoq, inunnit apeqqutigineqartut inuttut ataasiakkaanut sammivallaartut qulequttallu siammasinnerit oqaluuserineqarsinnaagaluartut, Jenseeraq Poulsen oqarpoq:

- Ataatsimut isigalugu ajorisassaanngilaq, kisianni allatut aaqqissorneqarsimasinnaagaluarpoq. Inuit apeqquteqartarnerat sulianut ataasiakkaanut tunngassuteqartutut isigivara.

Taanna taama oqarpoq, nangillunilu:

- Qinersisartut peqataatinneqarnerat ajunngiivippoq. Kisianni isumaqarpunga inuiaqatigiit qanoruna qinersinerup kingorna allannguutissatut misigineqartariaqartut.

Naak nunatta namminersulivinnissaa, nunatta Danmarkip naalagaaffianut inissisimanera Trumpillu nunatsinnut soqutiginninnera sapaatini akunnerni kingullerni oqaluuserineqartaraluaqisoq qineqqusaarnermi oqaluuserineqannginnera ilaatigut taassuma maqaasivaa.

- Naalagaaffinngussagutta suunukua atugassat naatsorsuutigisariaqarigut? Nunanik allanik suleqatissaqarneq pissutsit qanoq inississappat? USA-mi præsidentip nutaap nunatsinnut soqutiginninnera tusanngilarput.

Jenseeraq Poulsen taama oqarpoq, nunatsinnilu ajornartorsiutit pissutsillu oqaluuserineqannginneri uggorai:

-Suliffissaaleqisut, utoqqaat atugaat, oqaatsitta pingaartissusai, inuusuttut katataasimasut, nunatsinni ineqarniarneq tamani ajornartorsiutaavoq – inuusuttut ilinniarsimagaluarlutik akilersinnaasaminnik ineqalersinnaanngillat. Tamakku oqallisiginissaat amigaatigaakka.

Nunamiillu allamit nunatsinnut nuunnikut pillugit inatsit nutarsarnissaat oqaluuserineqarsinnaagaluartoq, Jenseeraq Poulsenip oqaatigaa.

- Allamiut tikinnikut qanoruna atugassaritinneqartariaqartut? Naalagaaffinngornissamut eqqartuineq annikitsuaraavoq.

Partiillu ilisaritinnerminni oqariartuutigisaat ilisarnaraluartut, Demokraatit ilisaritinnerminni ilaqutariit pillugit, naak siuliani politikkerisanngikkaluakkaminnik oqariartuuteqartut, Jenseeraq Poulsen isumaqarpoq.

- Demokraatit ilaqutariit aallaavigalugit ilisarititsinerat maluginiarpara, siuliani taamaattarnikuunatik, Jenseeraq Poulsen oqarpoq.

Frederik Lundip radiokkut aallakaatitassiamini "Ulluni Makkunani"-mi Jenseeraq Poulsenimut oqaloqatiginnittuuvoq.