DR isornartorsiorneqangaatsiartoq: - Ikinnerussuteqartunik avoqqaarinnilerneq killissamik qaangiineruvoq

Danmarks Radio isornartorsiorneqaqqippoq.

“Ammip qalipaataa aallaavigalugu nikassaaneq naalagaaffimmit taperserneqartoq”, “DR nunasiaateqarpalaartoq”, “ajornerpaamik ilaarutilliineq”. DR quiassutiginninnermik aallakaatitassiamik, quiasaarisartumit Jonathan Spangimit aallakaatinneqartumit “Tæt på sandheden”-imit ilanngutaqareernerani oqaaseqaatigineqartut tusindilippassuit ilaat taama allassimapput.

Quiassuaatiginninnermik aallakaatitassiaq piviusulersaarusiortuusaarneruvoq, tassani ilisimatusartup – kiinnamigut kakiorneqartup annoraaqartullu – Danmarkip oqallisaangaatsiartumik “Kæmpe Eskimo”-mik iluanaaruteqarsimanera misissorpaa. Ilanngutassiaq DR-ip piviusulersaarusiaanik “Grønlands Hvide Guld”-imik ilaarutilliineruvoq, taanna tusagassiorfiup innuttaasunut kiffartuussisussaatitaasup oqallittoqangaatsiartoqarnerata kingorna qaammammi matumani siusinnerusukkut saqqumiunnaarsippaa.

Maannali inuit arlallit DR ammip qalipaataa aallaavigalugu nikassaasutut politiinut unnerluutigaat. Henriette Berthelsen Qeqertarsuatsiaaneersoq ullumikkulli Danmarkimi najugaqartoq taakku ilagaat.

- Ilanngutassiaq takugakku nuanniitsumik misigiffigaara. Naakkut annialerpunga merianngulerlungalu. Nikanarsaangaatsiarpoq. Piffissap ingerlanerani quiasaarutit assigiinngisitsisut nalaattarsimasakka paasilerpakka. Nuanninngilluinnarpoq, taanna oqarpoq.

Københavnip Politiivisa quiassuaatiginninnermik ilanngutassiap unnerluutigineqarsimanera uppernarsarpaat.

Kultureqarnermut ministeri akuliuttariaqartoq

Quiassuaatiginnilluni aallakaatitassiaq politikkikkut aamma oqaluuserineqarpoq.

IA-meersoq folketingimut ilaasortaq, Aaja Chemnitz danskit kultureqarnermut ministerianut, Jakob Engel-Schmidtimut (M) aamma apeqquteqarpoq, taassuma ministerip “innuttaasunut tusagassiornermik kiffartuussisussaatitaasup, naalagaaffimmit taperneqartartup taama narrunarsaatigisumik imaqartumik suliaqarnera Kalaallit Nunaata Danmarkillu suleqatigiinnerannut iluaqutaasorineraa” paaserusuppaa.

-Oqartussaasut uparuartorniarnerannut quiasaarutiginninneq ajunngilaq. Tamanna politikeritut aamma akuersaarsinnaasariaqarparput. Kisianni inunnik ikinnerussuteqartunik nikassaaneq killissamik qaangiinerusoq isumaqarpunga, Aaja Chemnitz oqarpoq.

IA-meersup oqarnera naapertorlugu quiasaarutiginninnermi isiginnaartitsisup naggueqatigiit inuit kakiornerannik titartarneqarnera pingaartumik isornarluinnartuuvoq. Tamatuma saniatigut ilanngutassiap sikumut oqallisaangaatsiartumut “Kæmpe Eskimo”-mut tunnganera aamma isornartorsiorpaa.

- Naggueqatigiittut inuttut imminut nassuiaatigisarnerput pissutigalugu “Eskimo-is”-imik ateqarnissaa kissaatiginatigu oqaatigigutsigu taava isumaqarpunga ikinnerussuteqartut nikanarsarnagit tamanna ataqqineqaannartariaqartoq.

Aaja Chemntiz quiassuaatiginninneq oqallisaangaatsiartoq nunatta Danmarkillu akornanni avissaanganermut annerulersitsisoq isumaqarpoq. Assi © : Mads Claus Rasmussen/Ritzau Scanpix

Piviusulersaarusiaq “Grønlands Hvide Guld” nunatta Danmarkillu akornanni avissaanganerulersitsereersoq Aaja Chemnitz isumaqarpoq. Quiassuaatiginninnermillu aallakaatitassiaq tamamunnga annikinnerulersitsinngilaq.

Taamaammat IA-meersup kultureqarnermut ministeri akuliuttariaqarsoraa.

- Naalagaaffimmit Danmarks Radiomut akiliuteqartoqartartillugu akisussaaffeqartoqarpoq. (DR-imit aaqq.) piffissami matumani taama iliuuseqartoqarnera nunatta Danmarkillu akornanni oqallinnermut iluaqutaanngilaq, Aaja Chemnitz oqarpoq.

Imminut isummersorfigisariaqaraluartoq

Inuit Circumpolar Councilip (ICC-p) DR sakkortuumik aamma isornartorsiorpaa. Suleqatigiiffiup oqarnera naapertorlugu quiassuaatiginninnerup piviusulersaarusiamik 'Grønlands hvide guld'-imik suliaqartut nikassarpai.

- DR-ip piviusulersaarusiami kingorna kukkussuteqarsimanini saqqummiussimagaluaruniuk DR2-p quiassuaatiginninnera iluatsissimasinnaagaluarpoq (…).

- DR2-p isiginnaagassiaq narrujuummisaarisumik ammip qalipaataanut immikkoortitsisumik suliaralugu toqqarsimavaa, tamannalu akuersaarneqarsinnaanngilaq, ICC-mi siulittaasoq, Sara Olsvig, tusagassiuutinut nalunaarummi allappoq.

ICC-p nunatsinnit kalaallinut ataqqinninnerusoqarnissaanik piumasaqaammik ataatsimoortumik nalunaaruteqartoqarnissaa kaammattuutigaa.

KNR-ip isornartorsiuineq DR-imut saqqummiuppaa. Nutaarsiassaqartitsiviup oqarnera naapertorlugu quiassuaatiginninnermik ilanngutassiami DR-imik DR-illu 'Grønlands hvide guld'-imut atatillugu iliuuseqarneranik quiassuaatiginninnissaq siunertaavoq.

- Kalaallit Nunaata kalaallilluunniit quiasaarutiginissaat siunertaanngisaannarput. Tamanna ersarilluinnarsoraarput.

- 'Tæt på sandheden' quiasaarutiginninneruvoq, sunalu tamaat kikkullu tamarmik nalinginnaasumik quiasaarutigisarlugit. Taamaammat sammisat tamarmik quiasaarusiornerupput, quiasaarinerilli kikkunnut tamanoortuuneq ajorput, taakkulu assigiinngitsumik aamma paasineqarsinnaallutik. Quiasaarutiginninneq taamaappoq. DR-ip aamma piviusulersaarummi oqallisaangaatsiartumi atorneqarsimasut quiasaarutigineqarnissaat siunertaapput, Kalaallit Nunaat kalaallillu quiasaarutigineqanngillat, aallakaatitassiami pisortaq, Anne Garlich allakkatigut akissummi oqarpoq.

Quiassuaatiginninnermik aallakaatitassiortoqarnerata kingunerisaanik Nuummi eqqissisimasumik akerliussutsimik takutitsisoqarnissaa nalunaarutigineqarpoq. Akerliussutsimik takutitsinissamik aaqqissuisut "danskit politikeriinit, tusagassiorfinnit inoqatinullu attaveqaasersuutitigut naqisimaneqarnerit akuerineqarsinnaanngitsut" nassuiaatigaat.