Piniarsinnaanermut akuersissutinik digitalikkut aaqqiissut nutaaq atorlugu ajornannginnerusumik pissarsiariuminarsititsisut
Piniartut tuttunut umimmannullu piniarsinnaanermut akuersissummik siornatigornit sukkanerusumik ajornannginnerusumillu qinnuteqarsinnaanngorput.
Aalisarnermut Piniarnermullu Naalakkersuisoqarfik qarasaasiakkut nammineerluni kiffartuunnissamut aaqqiissutissanik digitaliusumik nutaamik atulersitsipput, taamaaliornikkut sullissivik.gl. aqqutigalugu piniarsinnaanermut akuersissummik qinnuteqarnissaq aamma pisanik nalunaaruteqarnissaq periarfissaalersillugu.
Periarfissaq nutaaq aqqutigalugu innuttaasut piumasaqaatinik naammassinnissimasut piniarfissanilu pisassat killilerneqarsimatinnagit akuersissutinik erngerlutik pissarsisinnaalissapput.
Piniartunut digitalikkut aaqqiissteqarneq piniartunut siuariarnerujussuusoq, aalisarnermut piniarnermullu naalakkersuisoqarfimmi AC-fuldmægtigiusoq Nuka Møller Lund oqarpoq:
-Tamanna piniartunut oqilisaassinerussaaq, tassami innuttaasunik kiffartuussivimmut piniarsinnaanermut akuersissummik qinnuteqarnissaminnut pisaminnillu nalunaarsuiartornissaminnut orniguttariaqarunnaassammata. Tamanna nittartakkakkut MitID atorlugu maanna ingerlanneqarsinnaanngorpoq, taanna oqarpoq.
Sullissinernut allanut nukissaqarnerulersitsisoq
Pisortani sullissinermi nutarsaanikkut pisariillisaanermillu digitaliusumik aaqqiissuteqarneq suliniutit anginerit ilagaat. Tamatuma saniatigut sulisunut sullissinermi nukissaqarnerulersitsivoq, Nuka Møller Lund nassuiaavoq:
- Piniartut pisariaqanngitsumik utaqqisarunnaaginnanngillat, innuttaasunilli kiffartuussivinni imaluunniit nunaqarfiup allaffiani sulisunut nukissaqarnerulersitsivoq.
Naak piniarsinnaanermut akuersissut nittartakkakkut aaneqarsinnaanngoraluartoq, innuttaasunik kiffartuussivimmut ornigulluni suli qinnuteqartoqarsinnaanera periarfissaavoq:
- Soorunami piniarsinnaanermut akuersissummik ornigulluni suli qinnuteqartoqarsinnaakutsoorpoq, Nuka Møller Lund oqarpoq.
Piniarsinnaanermut akuersissummik qinnuteqarnissamut digitalikkut aaqqiissuteqarneq, nunatsinni innuttaasunut tamanut pisariillisaataassasoq naatsorsuutigineqarpoq.
