Ataatsimeersuartoqareernerani: Oqaatsigut ataannassappata iliuuseqartoqartariaqarpoq
Kalaallit oqaasii ulorianartorsiorput piuneerussinnaappummi.
Taama oqarpoq 74-nik ukiulik Per Langgård, taanna inersimasutut inuunermi annersaani kalaallit oqaasiinik sammisaqartuuvoq aammalu Oqaasileriffimmi siunnersortaaneruvoq.
- Oqaatsigut paarinngikkutsigit ullullu ilaanni iterluta paasilinngikkutsigu oqaatsigut namminneerlutik uumaniarsarisinnaanngitsut uumaannassagunillu atuisuminnit iluamik nakkutigineqarlutillu paarineqartussaasut tammassapput, Per Langgård KNR-mut oqarpoq.
Naalakkersuisup Peter Olsenip (IA) sapaatip akunnerata siuliani oqaatsit pillugit ataatsimeersuartitsinerani taanna taama oqarpoq.
Isummaminnik namminneerlutik ataniartussaanngillat
Ataatsimeersuarneq qulequtalik "Oqaatsitta atugaaneranni ilinniartitsissutaanerannilu anguniakkat najoqqutallu” marsip 29-ani, 30-anilu inunnik 100-nik peqataaffigineqartoq Nuummi Hotel Hans Egedemi pivoq.
Ataatsimeersuarnermilu siunertaq unaanaanngilaq kalaallit oqaasiisa ataannartinnissaat aammali qanoq ineriartortinneqarnissaat matumani siunertaavoq. Taamaalilluni politikerit oqaatsit pillugit politikkimik ungasissumut isigisumik sakkussaqalersinnaaqqullugit.
Per Langgård ataatsimeersuarnermi peqataavoq, taassuma ataatsimeersuarneq iluaqutitaqarnerarpaa.
- Ataatsimeersuarnermi ajornartorsiutit arlallit eqqartorneqartariallit eqqartorpagut. Kalaallimmi oqaasii ikittuinnarnit nunarsuarmi atugaapput aammali pingaaruteqarnerpaanut ilaallutik tamannalu soorunami tulluusimaarutigisariaqarparput, kisianni eqqaamassavarput oqaatsit isummaminnik uumasinnaanngillat, taanna oqarpoq nangipporlu:
- Kalaallit oqaasii ataannassappata paarilluartariaqarpagut. Isumaqarpungalu ataatsimeersuarnermi matumani arlallit tamatumunnga uisinneqartut.
Taanna oqarpoq, peqataasut oqaatsitta ineriartortinneqarnissaannut sulissuteqartussaanerminnik uisinneqarnerat malugigini.
Allattaaseq nukittooq
Allanneq oqalunnerlu assigiinngilluinnartuupput.
Nunarsuarmi qarasaasiatigut ineriartupiloorneq atuutsillugu kalaallisut allattaaseq nukittooq pisariaqarluinnartoq Per Langgård isumaqarpoq, oqaatsit inittortariaqarput aammalu kitaamiut oqaasii atorlugit allattaaseq ingerlanneqartariaqarpoq.
- Allattaatsimi nukittuumik atorsinnaalluartumillu tamarmillu paasisinnaasaannik inissisimasoqanngippat taava ajornanngitsuararsuarmik oqaatsinut allanut sangusoqapallassiinnaavoq, ineriartorneq ullutsinni atuuttoq tunaartarissagutsigu qularnanngilaq tuluit oqaasiinut sangusoqassaaq, oqarpoq nangipporlu:
- Allattaaseq aallunneqarluanngippat taava tassa siunissami kinguaariit ataasiinnarnut taamaallaat killissaagut, oqaatsigummi atorneerukkiartulissapput. taakkualuukua marluk imminnut atalluinnartuusut.
Qanormi iliussaagut?
Sunali tamarmi neriuutissaqanngitsutut isikkoqanngilaq, Per Langgård oqarpoq. Taannami naapertorlugu oqaatsit ataannartinneqassappata ullut tamaasa ajornanngitsunnguamik alloriartoqalaaginnartussaavoq.
- Ajornanngitsuararsuugaluarpoq, imminummi piumaffigilaaginnartoqarsinnaavoq oqaatsitta eqqarsaatigalugillu atornerunissaannut. Århusimi ilisimatuut ilaat silatuumik ima oqarnikuuvoq; oqaatsit ineriartunngillat ingerlasunukua. Assorujussuarlu isumaqatigaara.
Politikkeqarluarnissarli aamma pisariaqarpoq, matumani meeqqat atuarfii Ilinniarnertuunngorniarfiillu piumasaqarfiginerusariaqartut taanna erseqqissaavoq.
- Pisarnermiit annerusumik alloriarujussuartariaqarpugut assorujussuaq taamaaliorsinnaalluarpugullu. Immitsinnut akunnitsinnilu annerujussuarmik piumaffiginerusariaqarpugut, peqqissumillu siunissami oqaaseqassagutta taamaaliortariaqarpugut, Per Langgård oqarpoq.
Beatrine Heilmann, Oqaasileriffimmi pisortaasoq aamma ima oqarpoq:
- Oqaatsit pillugit nunatsinni politikkeqaraluarpugut. Taanna kalaallit oqaasiisa pisortatigoortumik oqaasiunerannik erseqqissaataaginnarpoq. Oqaatsilli pillugit pilersaarusiortoqarsimanngilaq, taamaattumillu politikki taanna atuutsikkuminaaqaaq Oqaasileriffiugaluaruttaluunniit, Beatrine Heilmann Oqaasileriffimmi pisortaq KNR-mut oqarpoq
