Oqaasileriffik: Ilitsoqqussaralugit oqaatsit aallunneqaqqaartariaqarput
Ilinniartitsisut ilinniutillu atuutilersitsinissamut piareersimanngillat. Ilitsoqqussallu oqaatsit aallunneqaqqaartariaqartut Oqaasileriffimmiit isumaqarput.
- Kalaallisut ilinniartitsineq piitsaanerulinngippat, tuluttoortitsineq qallunaatoortitsinermiit pitsaanerunaviannilaq, kalaallisullu oqaatsinik ilinniartitsineq maanna naammaginanngilaq, Oqaasileriffimmi siunnersortaaneq, Per Langgård oqarpoq.
Oqaasileriffimmi tuluttoornerulernissamut akerliliinngikkaluarlutik, pilersaarusiorluarnissaq pingaartippaat.
- Kalaallisut oqaatsit pissusaat sannaat, ilisimanngikkutsigit, aamma imaaliallaannaq nuutsinniarneq ajornartorujussuussaaq. Taamaammat soorlu massakkut tuluttoortitsisarneq taassuma tunngavigivaa ilinniutit qallunaajaqqanut naleqqussakkat, kalaaliaqqanoortuunngillat, Oqaasileriffiup pisortaa, Katti Frederiksen, taama oqarpoq.
Meeqqat atuarfianni atualeqqaat 2018-imiit tuluttoortalernissaannik siunnersuut Ilinniartitsisut kattuffianiit, IMAK-imiit piviusorsiunngitsuusutut oqariartuutiginikuuaat, ilinniartitsisut piareersimanngitsut, oqarlutik.
Siunnersuut piviusunngortinneqaraluaruni iluatsinngitsuussasoq Per Langgårdip ilimanaatigaa.
- Meeqqat atuarfimmi oqaatsinik ilikkarneq ajorput, qarasaasiami pinnguartarfimmilu pinnguaraangamik oqaatsinik ilikkarniakkaminnik ilikkartarput. Meeqqat atualerlaat tuluttoortaleraluarunilluunniit, aneerlutik tuluttut pinguaqatigiissiinnaanngillat. Taamaammat iluatsinngitsoornissaa ilimanartorujussuuvoq, Per Langgård oqarpoq.
Kalaallisut atuartitsinerunissaq Oqaasileriffimmit aalluunneqarnerusariaqarsoraat, Kalaallisut piginnaasakinneq ullumikkut takussaaqimmat.
- Kalaallisoornermut ilikkarnerulernissaq uagut pingaanerutipparput, taamaalilluni takornartat oqaasiinik, soorlu tuluttoornermik qallunaatoornermilluunniit ilikkarnissaq piuminarnerulissaaaq, ullumikkut piginngisaminnik sakkussaqarnerulissagamik. Tamanna pingaarneruvoq, Per Langgård taama oqarpoq.