Oqaasiliortut: Kalaallit oqaasiisa salliunissaannik siunertaq angussaavoq, sulisulli aningaasallu amigaataapput
Kalaallit oqaasiisa Namminersorlutik Oqartussat ingerlatsineranni salliullutik inissinnissaat Naalakkersuisoqatigiilersut anguniagaannut ilaavoq.
AAMMA ATUARUK Naalakkersuisoqatigiilersut oqaatsit pillugit isumaqatigiissutertik assigiinngitsumik isumaqarfigigaat
Tamannalu piviusunngussappat oqaatsinik ilisimasallit kalaallisut taaguuteqanngitsorpassuit suliarineqarnissaat kaammattuutigivaat.
Taamalu oqarneq Oqaasiliortut siulittaasuata Mariia Simonsenip taperserpaa.
- Qujaqaanga pissusissamisoorluinnarporlu tamakkua tikkuartorneqarmata. Sorpassuartigut kalaallisut taaguutinik malinnaasinnaanngillat, ilinniartitaanikkut pingaartumik.
Taanna taaguusersuuserineq pisariungaatsiartoq taaguutip isumarpiaa nutsiinnarnagu taaguusertariaqartoq erseqqissaavoq. Ajornartorsiuteqaqisorli, oqaasiliortut siulittasuat oqarpoq.
Tassami ullumikkut taaguusersuuserinermik immikkut ilisimatusarsimasut marlussunnguinnaapput. Siunissamilu oqaatsivut annaanniassagutsigit malunnaatilimmik iliuuseqartoqartariaqartoq, taanna oqarpoq.
- Siunissamut aningaasanik, nukissanik, ilinniartitsinernik tamakkuninnga ilumoorutiivillugu malunnaatilimmik iliuuseqartariaqarpugut oqaatsivut annaanniassagutsigit.
Oqaasiliortut suliassaraat:
1) kalaallit oqaasiisa ineriartornerat malittarissallugu, tassunga ilagitillugu kalaallisut oqaatsit, oqariartaatsit aamma oqaasilioriaatsit nutaat oqaasersiallu katersussallugit nalunaarsussallugillu,
2) oqaatsinik eqqussanik (taarsiullugu oqaasiliat) kalaallisut pisortatigut atortussanngortitanik taaguusiussallutik,
3) suliassaqarfinni taaguusersuutit akuerisassallugit, ilagitillugit sulinermi oqariartaatsit suliaqarfinnilu aalajangersimasuni oqaasilioriaatsit,
4) aqqit siuliaqutit kalaallisuumit pilerfillit akuerisassallugit,
5) pisortatigoortumik kalaallisut allattaaseq aalajangersassallugu,
6) kalaallit oqaasii pillugit aamma allamiut oqaasiisa nutaat aqqillu atugaanerannik pisortat inuillu siunnersortassallugit, ilitsersortassallugit qaammarsartassallugillu,
7) Nunat Aqqinik Aalajangiisartut, pisortat, suliffeqarfiit il.il. suleqatigisassallugit,
8) nunani allani ingerlatsiviit assingusut suleqatigisassallugit.
Najoqqutarisaq: Oqaasiliortut pillugit Inatsisartut inatsisaat nr. 5, 1. juni 2017-imeersoq.
Oqaasiliortunut ilaasortat tallimaapput
Oqaasiliortut inatsisit malillugit taaguutinik tamanit atorneqartussaasunit akuersisartuusut ukiut sisamakkuutaarlugit Naalakkersuisunit toqqarneqartartunik tallimanik ilaasortaqarput.
Ilisimatusarfik, Nunatta Atuagaateqarfia, Kalaallit Atuakkiortut, Tusagassiornermi Sulisut Peqatigiiffiat kiisalu Nutserisunut oqalutsinullu kattuffik oqaasiliortunut ilaasortassanik innersuussisartuupput.
Innersuussaq inuiaqatigiinnik, oqaasiinik kulturiannillu ilisimasaqassaaq nunatsinnilu najugaqassalluni.
Oqaasiliortut 2021-mi taaguutit 653-it, 2020-mi 121-t, 2019-imilu 45-t akuerisimagaat ukiumoortumik nalunaarusiami takuneqarsinnaapput.
Oqaasileriffiup nittartagaani taaguutit Oqaasiliortut akuerisaat takuneqarsinnaapput: https://taaguutit.iterm.dk.
Kalaallit oqaasiisa Namminersorlutik Oqartussat ingerlatsineranni salliullutik inissisimalissasut, Inuit Ataqatigiit Siumullu naalakkersuisuisoqatigiileramik isumaqatigiissumminni allappaat.
Tamannali anguniassagaanni kalaallisut taaguusigassarpassuit suliareqqaagassaasut oqaatsinik ilisimasallit marluk KNR-imi oqaloqatigisagut tikkuaapput.
AAMMA ATUARUK Kalaallisut taaguuteqanngitsorpassuit suliarineqarnissaannik oqaatsinik ilisimasallit marluk kaammattuipput
Assersuutigalugu allaffissornermi, aningaasanut, inatsisinut, aamma napparsimaveqarfinni taaguutit amigaataasut, Carl Christian Olsen aamma Arnaq Grove oqarput.
Oqaasileriffik Oqaasiliortunut allattoqarfiuvoq.
