Oqaasileriffimmi pisortanngortoq: Allatat kukkunillit amerlavallaaqaat
Kalaallit oqaasiinik suliaqarfik, Oqaasileriffik, juulip aallaqqaataanit pisortartaarpoq.
Beatrine Heilmann Oqaasileriffimmi 2007-imiilli atorfeqarpoq, piffissallu ilaanni pisortaagallartarsimalluni. Maannalu pisortanngornini nuannaarutigaa.
- Tulluusimaarnaqaaq, aamma akisussaafferujussuartut isigivara taanna maannakkut atorfigiligara. Ineriartortitseqqinnissamut ammaassisuuvoq aamma qarasaasiaq atorlugu oqaasilerinerup tungaatigut, Beatrine Heilmann KNR-mut oqarpoq.
Oqaasersiat kalaallisut taaguuserusukkai
Taassuma Oqaasileriffimmi suliat ingerlareersut nanginniarlugit oqaatigaa, aammali oqaaserpassuit kalaallisut taaguuteqartinneqanngitsut taaguusernissaat siuttuuffigerusuppaa.
- Taava ajornannginnerulertarpoq kalaallisut taaguutit piutinnagit qallunaatut oqaaseqarluni oqaloqatigiinnissaq. Kisianni kalaallisut taaguutit inisseriarpata ajornannginennerulissaaq aamma kalaallisut oqaaseqaluni suliffeqarfinni oqaloqatigiinnissaq paaseqatigiilluni.
Kalaallit oqaasiini taaguutit eqqortumik allanneqartarnissaat pisortanngortup pingaartippaa, taamaattumik suliniutissaminut ilaatinniagaa tassaavoq, eqqortumik allannissamut ilitsersuut.
- Retskrivningsordbogi, tassa qanoq allannissamut ilitsersuut kalaallisut ordbogi siunissami ineriartortissallugu, taakkunani takuneqarsinnaassaaq oqaatsit qanoq allanneqarlutillu naanilersorneqarnisaat.
Allatat kukkuneqarpallaartut
Kalaallit oqaasii ineriartortuartutut taaneqartarput, pisortanngortorlu naapersorlugu kalaallit oqaasiini ullumi unammillernarnerpaaq tassaavoq allatat kukkuneqakkajunnerujussuat.
- Ajoraluartumik kalaallisut allatat maannakkut kukkunernik ulikkaarput. Oqaatsit ataasiakkaat allannissaanut tunngasut kukkunernik ulikkaartarput, kisianni aamma oqaaseqatigiit eqqarsaatigalugit aamma kukkunernik ulikkaartarput. Assersuutigalugu amerlasoorpassuit allamoorut maannakkut oqalunnerminni ilaatinngitsoortalernikuuaat, Beatrine Heilmann oqarpoq.
Pisortanngortoq kalaallini siullersaalluni oqaatsitigut teknolog-iuvoq.
Taanna tassaavoq qarasaasiaq atorlugu oqaasilerissutinik ineriartortitsineq. Soorlu kukkuniiaatit, oqaaseqatigiinnik misissueqqissaarutit nutserutillu tamarmik oqaatitsigut teknologiimik tunngaveqarput.
