Demokraatit Illuatungiliuttut naalakkersuisoqatigiinnut sunniuteqarsinnaassapput

Illutungiliuttut amerlapput. Illuatungiliuttut Inatsisartunut 15-inik ilaasortaqarput, tassalu partiit naalakkersuisuutitaqartut ilaasortaatitaat, 16-iusut, amerlaqatigingajallugit. Tamannalu Inatsisartuni sulinermut sunniuteqartupilussuussasoq, Demokraatit siulittaasuat isumaqarpoq.
Allattoq Ivik Kristiansen, Anton Gundersen Lihn
maajip 04-at 2018 20:28

Naalakkersuisoqatigiilersunut illuatungiliuttut ataasiinnarmik ikinnerussuteqassapput. Tamannalu Naalakkersuisoqatigiit sulinerannut sunniuteqartupilussuussasoq, partiimut illuatungiliuttumut Demokraatinut siulittaasoq, Randi Vestergaard Evaldsen isumaqarpoq.

- Soorunalimi annertoorujussuarmik sunniuteqartussaavoq. Kingullermik uagut naalakkersuisoqatigiinniikkatta taamatoqqissaaq inissisimavugut, aammalu unammilligassaavoq, Randi Vestergaard Evaldsen radioaviisimut oqarpoq.

AAMMA ATUARUK Naalakkersuisut illuatungiliuttunit tatineqassasut

Naalakkersuisoqatigiit suliassani assigiinngitsuni lluatungiliuttunut suleqatigiilluarsinnaassasut, Kim Kielsen, tusagassiortunik tallimanngornermi katersortitsinermi oqarpoq.

Demokratillu suliassaqarfinni arlalinni suleqataalluarsinnaapput.

- Assersuutigalugu meeqqanut atugassarititaasut qineqqusaarnerup nalaani eqqartorneranni suliassaasut aaqqitassaasullu partiit akimorluta isumaqatigiittorujussuuvugut, Randi Vestergaard Evaldsen oqarpoq.

AAMMA ATUARUK Suliffeqarnermi ilanngaat, mittarfiit soraarnerusutisialinnullu aningaasat amerlanerit

Demokraatilli naalakkersuisoqatigiinnut tamatigut isumaqataanavianngillat.

- Isumaqatiginngisagut annertungaatsiartussaassapput, Evaldsen taama oqarpoq nangillunilu.

- Isumaqatigiissutaat massakkut qimerluualaarpara, taavalu ersilereerpoq, isumaqatigiinngissutigisassagut arlaqartussaasut.

Demokraatit qinersinermi angusaqarluarput. Partiip qinigaatitai arfiniliupput, tassalu Inatsisartuni partiit annersaasa pingajuattut inissilluni. Taamaattoq naalakkersuisoqatigiinniissanngillat. Qinersinermi angusaqarluarnerminnit naammattumik pissarsiaqarsimanerlutik aperineqarami pissarsiaqarluarsimalluni akivoq.

- Aamma akisussaaffimmik annertuumik innuttaasuninngaanniit tunineqarpugut. Taanna illuatungiliuttuugaluarluta sulissutigikutsuussavarput, politikkerpullu sulissutigissallutigu, Randi Vestergaard Evaldsen oqarpoq.

AAMMA ATUARUK Siulittaasut nuannaartut naalakkersuisooqatigiinnissamut atsiortut

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq