Isumaqatigiissut: Suliffeqarnermi ilanngaat, mittarfiit soraarnerusutisialinnullu aningaasat amerlanerit

Siullermik Nuummi, Ilulissani Qaqortumilu mittarfiliornissanik pilersaarutit naammassineqartussaarpasipput:

- Nunatta oqaluttuarisaanerani maannamut suliniutit annersaat nutaanik mittarfinnik pilersitsinissaq naammassiniarlugu naalakkersuisooqatigiit sulissapput, aammalu erngup nukissiorfissat nutaat sanaartorneqarnissaat anguniarlugu sulissallutik. Isumaqatigiissummi taama allapput.

Tunngaviusumik inatsisiliornermut ataatsimiititaliaq aallartinnerlussimasoq, partiit amerlanerit qineqqusaarnermi isumaqatigiissutigivaat, tassanili sulineq nangissaaq:

- Naalagaaffinngornissaq anguniarlugu tunngaviusumik inatsisissamik suliaq aallartinneqareersoq qinigaaffimmi nangittumik ingerlateqqinneqarnissaa naalakkersuisooqatigiit isumaqatigiissutigaat, tamatumani partiit kiffaanngissuseqassapput ilaasortassaminnik toqqaanissamut. Partiit isumaqatgiisstiminni taama allapput.

AAMMA ATUARUK Siulittaasut nuannaartut naalakkersuisooqatigiinnissamut atsiortut

Taava aamma suliffeqarnermi ilanngaateqalernissamik Siumup qineqqusaarnermi neriorsuutaa 2019-imi piviusunngortinneqassaaq.

Siumup qineqqusaarutaa alla taamatuttaaq ippoq, tassalu soraarnerussutisiallit sulisinnaalissasut, tamatumuuna isertitatik soraarnerussutisiaminnit ilanngaatigitinnagit. Aamma aaparisap najugaqatigisalluunniit isertitai 2019-imiit soraarnerussutisianit ilanngaatigineqartarunnaassapput.

Aamma qinersisarnermut inatsisip allanngortinneqarnissaa naalakkersuisoqatigiinissamut isumaqatigiissummi ilaavoq, allapput "nunatta naapertuunnerusumik sinniiseqartarnissaa qulakkeerumallugu".

AAMMA ATUARUK Kielsen-ip Siverth, Hans aamma Vittus Naalakkersuisooqatigilerpai

Tamanna qinersivinnik atuutilersitseqqinnissamik isumaqarsinnaavoq, Siumummi taama ittumik qinersiviup siuliani siunnersuuteqarpoq, immikkoortorli taanna itisilerneqanngilaq.

Aamma Innarluutillit pillugit inatsisissaq, naalakkersuisoqatigiit siuliisa piareersagaat.  naammassineqassasoq, isumaqatigiissummi allassimavoq.

Nunatsinni  inuussutissarsiutini pingaarnerpaaq, alisarneq, eqqarsaatigigaanni, naalakkersuisoqatigiit nutaat alisarnermut Inatsisissatut siunnersuut, ukiaanerani ataatsimiinnermi siullermeerlugu suliarineqartoq, nangillugu suliariniarneraat, imaluunniit inatsisiliornissamut nutaamik piareersaasoqassanersoq erseqqissumik allassimanngilaq.

Naalakkersuisoqataalersut marluk, Siumut aamma Partii Naleraq qinersivimmi kingulermi siunnersuummik taassuminnga illersuisuupput.