Kielsen-ip Siverth, Hans aamma Vittus Naalakkersuisooqatigilerpai
Taamaalilluni naalakkersuisooqatigiilersussat Inatsisartunut qinikkanit 31-nit 16-iulerput.
- Siumuminngaanniit neriuuteqarluarpugut Naalakkersuisooqatigiinnik pilersitsinissatsinnut ukiut taakku tullii sisamat ingerlalluarnissatsinnut. Taanna aamma annertuupilussuarmik pisussaaffiliivoq. Tassami tusagassiortut eqqartoqattaarpaat minnerpaarpaaffimmik amerlanerussuteqarluta tassani ingerlatsilersugut. Amerlanerussuteqarneq amerlanerussuteqarneruvoq, Kim Kielsen oqarpoq.
Tamannattaaq isumaqarpoq Inuit Ataqatigiinnit, Demokraatinit Suleqatigiissutsisuniillu qinikkat ataatsimut 15-iusut illuatungiliuttussanngorlutik.
Tamannali Kim Kielsenip ernumanartoqanngitsoq tusagassiutinik katersortitsinermi oqaatigaa.
- Aamma suliassat assigiinngitsut eqqarsaatigalugit partiit allat qarmasissiami tassani isumaqatigiissumi tuniseqataanikuupput.
Naalakkersuisuni nutaani kikkut sorlermi inissisimanissaat suli inissinneqanngitsoq, partiit sisamaasut naalakkersuisooqatigiilersut paasissutissiissutigaat.
