Olmert: Sakkutuut ernumassanngillat
Israelimiut sakkutuuisa, sapaatip akunnerini pingasuni Gazamut saassussisaqattaarnerminni sorsunnermi pinerluuteqarsimasutut pisuutinneqartut, unnerluutigineqarnissartik naatsorsuutigissanngilaat.
Allattoq Elisa Isaksen
januaarip 25-at 2009 17:18
Taama neriorsuivoq Israelimi naalakkersuisut siuttuat Ehud Olmert.
- Sakkutuut naalagaat sakkutuullu allat Gazamut sorsukkiartinneqartut, nunat tamalaat eqqartuussiviinut assigiinngitsunut sassartinneqarnavianngillat, aamma Israelimit illersorneqarlutillu ikiorneqassapput, Olmert oqarpoq.
Israelip arlaleriarluni erseqqissartarpaa, inuppassuit najugaqarfiini toqutaasoqarnissaa sakkutuut pinngitsoorniarsimagaluaraat, oqaatigaluguli Hamasikkut inuinnaat akornanni toqqorlutik qaartartunik igeriuttakkanik eqqaassinerat unitsinniarsimagitsik.
Tamatuma peqatigisaanik nunat arlallit Israel sapaatip akunnerini arlalinni Gazamut saassuusisaqattaarnini pissutigalugit nunat tamalaat sorsunnernut eqqartuussiviannut unnerluutigineqassasoq piumasaraat.
