Nykøbing Falster Håndbold kalaallinik amerlanerusunik piumavoq
Nykøbing Falster eqqaalu 20.000-it sinnilaaginnarlugit inoqarami timersortartunik nuuttoqartarneranut malussarissuuvoq.
Sumiiffimmi tassani assammik arsartartut ilisimaneqarluartut Nykøbing Falster Håndboldimeersut tamanna malugaat niviarsissat U-19-ni unammisartut U-19 ligami unammisartuusut arsartui arlallit aallartussanngormata. Taamaasillutik U-19-ni pikkorinnerni unammisartut arsartui amigalertussanngorput.
Ligami sungiusaasoq Jakob Larsen maanna siunnersuuteqarpoq klubbimi aqutsisunit ilalerneqartumik.
- Assammik arsarnermi Nykøbing Falster Håndbold aamma kalaallit assammik arsartarnerat uummateqarfigaakka. Kalaallit assammik arsartarnerat inerisaaqataaffigerusuppara taamaattumillu klubbimi aqutsisut siunnersuuteqarfigfalugit kalaallinik arsartoqalernissamik periarfissarsiortoqarsinnaasoq, Jakob Larsen KNR-mut oqarpoq.
- Kalaallit assammik arsartartut U-19-ni unammisartuusinnaasut klubbitsinnut nuussinnaapput. Sungiusarnerup saniatigut najugassaqarnissaat aamma ilinniarfissaqarnissaat suliffissaqarnissaallu pillugit aamma ikiuussinnaavugut, Jakob Larsen oqarpoq.
Inissat ilinniartitaanerlu
U-19-ni unammisartut annaanniarnissaat pillugu pilersaarummik Jakob Larsenip avammut nalunaaruteqarnissaa sioqqullugu piareersaateqartoqareerpoq.
- Ilinniagaqassagaanni kollegiani najugaqarnissamut periarfissaqarpoq. Najugaqarfinnik tuniniaasartut aamma attaveqarfigineqareerput kollegiamiissanngikkaanni allamik inissaqarnissaq qulakkeerniarlugu, Jakob Larsen oqaluttuarpoq.
Kalaallit nuna tamakkerlugu sungiusaasuat Johannes Groth aamma attaveqarfigineqareerpoq, taannalu U-19-ni ligami unammisartuusinnaasunut attaveqaataasussaavoq.
- U-19-ni unammisartuusinnaasut allattugaatigivakka. Aamma puigussanngilarput nunanut allanut unammisartuunissaq piumasaqaataanngimmat, Johannes Groth oqarpoq.
- Kalaallinut unammisartunut periarfissatsialaavoq. Arsartunut ineriartuutaasinnaaqisumik sapaatit akunnerisa naaneri tamaasa unammisarnissamut periarfissiineruvoq. Taamaattorli aporfissaqarsinnaavoq Nunatsinni GU-miit Danmarkimi gymnasiamut nuussinnaaneq. Taamaattoq periarfissanik misissuivugut, Johannes Groth oqarpoq.
