Meeqqat pinnguaatigisarsimasaannik saqqummersitsilersut
Arktisk Institut Københavnimiittoq saqqummersitsisuuvoq, Nunatsinnilu pinnguaatit sammisaqaqatigiinnermut, sukisaarsaatitut inersimasunngornissamullu piareersaatitut atorneqartarnerat immikkut sammineqarpoq.
Saqqummersitsineq instituttip assilisanik katersai nalitsinni pisunik ilaqartillugit suliarineqarpoq.
’Pingaartumik Kalaallit Nunaanni meeqqat qanga pinnguaatigisartagaat maannalu qanoq ittoqarnera paasisaqarfigissavat’, Arktisk Institut saqqummersitsineq pillugu taama allaaserisaqarpoq.
Pinnguaatitoqqat misilinnissaannut saqqummersitsinermi aamma periarfissaqassaaq.
Saqqummersitsineq Nordatlantens Bryggemi atuarfinnut sullissivik suleqatigalugu aaqqissuunneqarpoq Christianshavnimilu Arktisk Instituttimi 1. salimi ulluinnarni takuniarneqarsinnaalluni.
