Ilinniagaq nutaaq pilersinneqalertoq: Tusagassiortut amerlanerusut pisariaqartippavut

Tusagassiornermik masterimik taallugu ilinniagaq nutaaq, Ilisimatusarfimmi aappaagu januaarip naalernerani aallartissaaq.

Taamatut ilinniagaqarsinnaanissaq ukiuni kingullerni pisariaqarnerulersimasoq, Tusagassiornermik Immikkoortortami pisortap Naja Paulsenip oqaatigaa:

- Pisariaqarmat. Ukiuni kingullerni tusagassiortunngorniartartut aallartittartut ikittunnguusarput, aamma qangali taamaannikuuvoq, taava inuiaqatigiit pisariaqartitaat eqqarsaatigalugit tusagassiortut amerlanerusut pisariaqartippavut massakkut, aamma siunissami. Taamaattumik allatut ittumik neqerooruteqarnissarput pisariaqartipparput, 
Tusagassiornermik Ilsimatusarfimmi Immikkoortortami pisortaq Naja Paulsen taama oqarpoq.

Ilinniarfik piginnaasanik qaffassarfiussaaq, ukiunillu marlunnik sivisussuseqassalluni, suliffigisarlu pigiinnarlugu ilinniarneqarsinnaassalluni.

AAMMA ATUARUK Ilisimatusarfimmi soraarummeersitsineq: 56-it allagartartaartut

Tusagassiornerup silarsuaani tusagassiortut sorliit amigaatigineqarnersut Naja Paulsne aperaarput, akivorlu:

- Amigaatigisorujussuuagut nutaarsiassalerisut soorlu inuussutissarsiornerup politikkillu iluani imaluunniit meeqqanut inuusuttunullu tunngasunik sammisallit, ilisimasaqarluartunik. Taakku neriuppugut pissarsiarisinnaassallugit nutaamik aaqqissuussinermi, Naja Paulsen taama oqarpoq, tusagassiortullu marluinnik oqaasillit inuiaqatigiinni amigaatigineqartut, taassuma oqaatigaa:

- Inuiaqatigiit uagutsitut ittut marluinnik oqaaseqartuunissaq pisariaqartippaat, taamaattumik uagutsinni aallartittartut allanut naleqqiullutik piumaffigineqarnerat annertunerujussuusarpoq, kisiannni taava iluatsikkaangamik inuiaqatiiginnut kiffartuussinerat annertoorujussuusarpoq.