Ilisimatusarfimmi soraarummeersitsineq: 56-it allagartartaartut

Covid-19-ip atugaanerani pissutsit allaannerupput, taamaakkaluartoq Ilisimatusarfimmi ilinniakkaminnik naammassinnittut ullup qeqqata siorna allagartartaarput.
Ilisimatusarfiup rektoria, Gitte Adler Reimer, Ilisimatusarfimmi ullumi soraarummeersitsinermi allagartartaartunut oqalugiarpoq. Assi © : Ilisimatusarfik
Allattoq Karsten Sommer
juunip 23-at 2020 12:11
Nutserisoq Jaaku Lyberth

Soraarummeersitsineq soraarummeernermilu uppernarsaatinik allagartanik tunniussineq, Ilisimatusarfimmi soraarummeertut kisimik peqataaffigisinnaavaat, qanigisaasut allallu peqataaffigisinnaanngilaat. Kisianni ilaqutaasut ikinngutaasullu angerlarsimaffimminnit malinnaasinnaaqqullugit soraarummeerneq nittartakkakut toqqaannartumik aallakaatinneqarpoq. Ilisimatusarfik taama ilisimatitsivoq.

- Corona apeqqutaatinnagu maanna inuunissinni pingaarutilissuarmik alloriarpusi. Inuunissi ilaa pingaarutilik, nutaajullunilu pissanganartoq, aallarnerparsi, rektori Gitte Adler Reimer allagartartaartunut oqalugiarnermini ilaatigut oqarpoq.

Ilisimatusarfimmi ullumi soraarummeertoqarnerani allagartartaartut 56-iupput. 35-it ilinniartitsisutut, tallimat peqqissaasutut, marluk inuiatigiilermik ilinniarsimasutut, qulingiluat inuussutissarsiornermi anigaasaqarnermik ilinniarsimasutut pingasullu tusagassiortutut allagartartaarlutik.

Taakkua saniasigut marluk kandidatinngorput, aappaa inuiaqatigiilerinermik ilinniarsimasutut aappaalu oqaasilerinermik, atuakkialerinermik tusagassiuutilerinermillu ilinniarsimasutut.

Ilisimatusarfimmi soraarummeerlutik nalliuttorsiortut nittartakkakkut toqqaannartumik aallakaatinneqarnerat Ilisimatusarfiup Facebookiani isiginnaarneqaqqissinnaavoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk