Naalakkersuisoqatigiilersussat meerartatsinnik inuusuttatsinnillu ikiuinermut aningaasaliisassasut – peqqinnissaqarfimmulli tunngasut eqqaanngikkaat

Socialdemokratit aamma Venstret ukiuni 40-ni siullermeerlutik naalakkersuisoqatigiilersussat ullumi saqqummiunneqarpoq. Moderaatit aamma naalakkersuisoqatigiinni peqataassapput.

Naalakkersuisoqatigiilersussat Siumumit, IA-mit aamma Savalimmiormiut partiiannit Javnardarflokkurrinimit taperserneqaramik amerlanerussuteqalerput.

Naalakkersuisoqatigiit tunngavissaanni immikkoortoq qulequtaqartoq ”Rigsfællesskabet”, tassa naalagaaffeqatigiinneq, qupperneq ataatsimik affarmillu takissuseqarpoq, Kalaallilli Nunaannut tunngasunik neriorsuutikippoq.

Naalakkersuisoqatigiilersut oqaatsit najoqqutatut atorniagaat tassaapput: ”Savalimmiut aamma Kalaallit Nunaat pineqartillugit Savalimmiut Kalaallillu Nunaat peqataatinnagit aalajangiisoqartassaanngilaq.”    

Tassa Kalaallit Nunaannut Savalimmiunullu tunngasut isumaqatigiinniutigineqartillugit folketingimi Atlantikup avannaannersut ilaasortat peqataatinneqartassapput – assersuutigalugu danskit aningaasanut inatsisaat aamma illersornissamut tunngasut isumaqatigiinniutigineqartillugit.

Kalaallit Nunaanni meeqqat inuusuttullu sumiginnakkat ukkatarineqassasut

Kalaallit Nunaanni meeqqanik inussuttunillu sumiginnakkanik ikiuineq naalakkersuisoqatigiilersussat nunatsinni naalakkersuisunik suleqateqarluni ingerlatiinnarneqassasoq isumaqatigiissummi aallassimavoq.

Aningaasat toqqaannartumik eqqaaneqanngillat, naalagaaffimmiilli tapiissutit ukiumut 4 milliardit koruunit sinnerlugit tapiissutigineqartartut saniatigut 50 millionit koruunit meeqqat inuusuttullu kinguaassiutitigut kannguttaatsuliorfigineqartarnerisa akiorniarneranut atugassanik Namminersorlutik Oqartussat tunineqartarput.

AAMMA ATUARUK Mette Frederiksenip Venstret Moderaatillu naalakkersuisooqatigilerai

KNR-ip paasisai naapertorlugit aningaasat tapiissutigineqartartut taamaaginnassasut naalakkersuisoqatigiilersussat akuerisimavaat. Taamaattorli naalakkersuisoqatigiilersussat tunngavigisassaanni tamanna allaqqanngilaq.

Atlantikup Avannaamiunut aningaasaliissutigineqartartut ullumi ukiumut 20 millionit koruunit immikkoortinneqartarput. Taakku aningaasaliissutit Kalaallit Nunaanni Savalimmiunilu suliniutinut assigiinngitsorpassuarnut atorneqartarput, soorlu pineqaatissinneqarsimunut inissiisarfinni nakkutilliisut akissarsiaasa qaffannerannut aamma Savalimmiuni timersortarfissuartaamut atorneqarlutik.

KNR-ip paasissutissaatai naaperlugt aningaasaliissutaasartut taamaaginnassapput. Tamannali naalakkersuisoqatigiilersussat tunngavigisassaanni aamma allaqqanngilaq.

Napparsimaviit aamma peqqinnissaqarfimmi ikiorneqarneq eqqaaneqanngitsut

Nunatsinni qineqqusaarnermi eqqartorneqangaatsiartoq, tassa peqqinnissaqarfik, maanna naalakkersuisoqatigiilersussat najoqqutassaanni ataatsimilluunniit eqqaaneqanngilaq.

Allaqqasorli tassaavoq kikkulluunniit piartortunik sulinngiffeqarlutik nunatsinnut Savalimmiunullu paaqqutarinnikkiartorsinnaalernissaat naalakkersuisoqatigiilersussat misissussagaat.

Nunatsinni peqqinnissaqarfimmiit ikiorneqartarneq pitsaanerulersinniarlugu Danmarkimiit ikiorneqarnissaq nunatsinni partiit arlallit kissaatigigaluarpaat. Kalaallinut Danmarkimi peqqissaaviliortoqarnissaa kalaallinullu kræftertunut immikkut aningaasaliisoqarnissaa danskit naalakkersuisoqatigiiligassaasa qulakkiissagaat, IA-p ilaatigut piumasaraa.

Immikkut aningaasaliissutit kræftertut nappaataasa suussusersineraniit ullut 30-t qaangiutsinnagit nakorsartittarnissaannut qulakkeerutaasassapput.

Naalakkersuisoqatigiilersussalli taakku tunngivissaminni eqqaanngilaat. Ataatsimiititaliarsuarmilli Danmarkip peqqinnissaqarfianik aaqqissuusseqqinnissamut pilersaarummik 2024-mi saqqummiisussamik pilersitserusupput.

AAMMA ATUARUK IA-p partii suleqatigisaa isuma-qatigiinniaqataajunnaaraluartoq Socialdemokratit suli taperserai

Naalakkersuisoqatigiilersussat nunarput pillugu pilersaarutaasa ilaat ukuupput:

• Naalagaaffiup nunatsinni suliassaqarfii nunatsinnit akisussaaffigineqalissanersut taamaattoqassappallu taakku qanoq pissanersut pillugit nalunaarusiorneq, assersuutigalugu inuussutissanut nunatsinnilu suliassaqarfiinut allanut tunngasuni.
• Kalaallit Nunaata politiivinut tunngasuni ineriartortitsiinnarnissamik ataavartumik nalilersuineq.
• Issittumi Atlantikullu Avannaani silap pissusianik imartaannillu ilisimatusarnernik attassineq.
• Naalagaaffeqatigiinnermi sutigut tamatigut ilisarisimasaqatigiinnissamik paaseqatigiinnissamillu nukittorsaaneq, soorlu ilinniartitaanikkut kulturikkullu suliniuteqarnikkut.
• Ministereqarfiit tamarmik susassaqarfitik misissussavaat nunatsinnilu susassaqarfimminni soorlu inatsisilerinermut assigisaannullu tunngasuni qanoq isumannaagassaqartigineranik qulaajaaneq. Naalakkersuisullu suleqatigalugit tamanna pilersaarusioqqissaarusuppaat.  
• Naalakkersuisoqatigiilersussat Savalimmiuni Kalaallit Nunaannilu Naalakkersuisut naalagaaffeqatigiinnermi killeqarfitsigut aporfeqarunnaarnissamut suliniutigisaminni suleqatigerusuppaat.