SFpeqataanngikkaluarunilluunniit Socialdemokratit siuttoralugit naalakkersuisoqatigiiliornissamut suli tapersiilluni, Aaja Chemnitz KNR-imut oqarpoq.Assi: Scanpix

IA-p partii suleqatigisaa isuma-qatigiinniaqataajunnaaraluartoq Socialdemokratit suli taperserai

Danmarkimi naalakkersuisunngortussat decembarip 14-iata 22-atalu akornanni sioqqulluguluunniit saqqummiunneqassasut, Aaja Chemnitzip ilimagaa.

Danmarkimi partiini naalakkersuisoqatigiiliornissamut isumaqatigiinniaqataasut ippassaq pingasunngornermi ikileqqipput. Isumaqatigiinniaqataajunnaartuusoq tassaavoq Inuit Ataqatigiit Folketingimi partiini suleqatigisaa, SF.

SF-ilu peqataanngikkaluaruniluunniit Socialdemokratit siuttoralugit naalakkersuisoqatigiiliornissamut suli tapersiilluni, Aaja Chemnitz KNR-imut oqarpoq.

Aamma Socialdemokratit Venstrekkullu immaqalu Moderatillu naalakkersuisoqatigiiliussagaluarpataluunniit tapersiiniarluni oqarpoq. 

-  SF-ilu politikkikkut pingaartitatta assinginik, tassa silap pissusianut, nukissiuutinut ataavartunut taavalu meeqqanut inuusuttunullu tunngasunik, pingaartitsisut suleqatiginiarpagut. Taakkua SF-ilu pingaartitaraavut, Folketingimili partiit allat taakkuninnga uagutsitulli pingaartitsipput, Aaja Chemnitz oqarpoq.

Danmarkimi naalakkersuisoqatigiiliorniarneq aatsaat taama sivitsuuttoortigaaq. Folketingimut novembarip aallaqqaataani qinersivugut, tamatumalu kingornali ministeriunerugallartoq, Mette Frederiksen, taamanili nutaanik naalakkersuisoqatigiiliornissamut isumaqatiginninnialerpoq. Danmarkimi aatsaat taama sivisutigisumik naalakkersuisoqanngilaq. Naalakkersuisunngortussanillu qaqugu saqqummiisoqassanersoq suli ilisimaneqanngilaq.  

Sapaatit akunnerata tulliani nutaanik naalakkersuisoqalerataannaasoq

Aaja Chemnitzili eqqoriaavoq:

- Danmarkimi naalakkersuisunngortussat decembarip 14-iata 22-atalu akornanni sioqqulluguluunniiit saqqummiunneqassasut ilimagaara, taanna oqarpoq. 

Siammasissumik suleqatigiittunik naalakkersuisoqatigiiliortoqarnissaa, Mette Frederiksenip qineqqusaarutigaa. Siammasissumik suleqatigiillutik naalakkersuisunngortussanut ilanngutilerunarlutik, Venstrep siulittaasua Jakob Ellemann-Jensen TV2-mut ataasinngormat oqarpoq.

AAMMA ATUARUK Aaja Chemnitz: Løkkep qinersinerup unnukkuani sianerfigalunga taperseqquvoq

Aaja Chemnitzillu tamanna ajornaquteqartinngilaa. Tassami Atlantikup Avannaamiunut aningaasaliissutigineqartartut 20 millionit koruuniniit 30 millionit koruuninut amerlineqarniartut, taanna oqarpoq.

- Mette Frederiksenilu ataatsimiinnitsinni siullermi tamanna piumasaraarput, Aaja Chemnitz oqarpoq.

Taanna ministeriunerugallartorlu ataasinngormat ataatsimeeqqipput, suulli eqqartorsimanerlugik taassuma oqaatigerusunngilaa. 

Qinersinerup inernera

Saamerliuniat 87-inik Folketingimut novembarip aallaqqaataani qinigaatitarput, talerperliuniallu 73-inik qinigaatitaqarlutik. 

Tassa taakkunani arlaannaalluunniit 90-it inorlugit qinigaatitaqarmata arlaannaalluunniit amerlanerussuteqanngillat.

Taamaammat amerlanerussuteqalerniarpata partiit allat tapersersortigisariaqarpaat. Tamanna qinikkani Atlantikup avannaaneersut sisamaasut soqutiginartumik inissisimanerannik kinguneqarpoq. Aki-Matilda Høegh-Damimi Aaja Chemnitzilu qinigaagamik saamerliuniat Folketingimi marlunnik ilapput, ministeriunerugallartummi Mette Frederiksenip saamerliuniat siuttuuffigisaannik naalakkersuisoqatigiiliussaguni pisariaqartippai. 

Danmarkimili siammasissumik suleqatigiittunik naalakkersuisoqalissappat, qinikkani Atlantikup avannaaneersut pisariaqartinnerpaanavianngilai.