Aaja Chemnitz: Løkkep qinersinerup unnukkuani sianerfigalunga taperseqquvoq
Aaja Chemnitz (IA) Moderaternit siulittaasuannit, Lars Løkke Rasmussenimit pingasunngornermi unnukkut sianerfigineqarpoq, taassumalu Aaja talerperlernut tapersiinissaminik isumaliuteqarsinnaanersoq aperaa.
- Partiit talerperliit saamerliillu imminnut manna qaningaatsiarput, IA-lu qinikkani aalajangiisuulersinnaavoq, Aaja Chemnitz oqarpoq.
- Tassunga atatillugu talerperlerneersumik tapersiisinnaanissamut qanoq inissisimanersunga tusarniarlugu attavigineqarpunga.
Tamannali itigartitsissutigaa.
Taaguussinerit ima agguataarsimapput:
Siumut 37,6 procentinit taaguunneqarpoq.
Inuit Ataqatigiit (IA) 24,6 procentinit taaguunneqarpoq.
Demokraatit 18,5 procentinit taaguunneqarpoq.
Naleraq 12,2 procentinit taaguunneqarpoq.
Atassut 3,6 procentinit taaguunneqarpoq.
Attaviitsoq Tillie Martinussen 0,9 procentinit taaguunneqarpoq.
- Uannut Dansk Folkeparti, Nye Borgerlig aamma Danmarksdemokraterne uagut ilaaffigalugit naalakkersuisuulernissaannut tapersiinissarput periarfissaanngilaq, Aaja Chemnitz oqarpoq.
AAMMA ATUARUK Taasinerit tamarmik kisinneqareerput – nunarpullu pingaarutilimmik inississinnaavoq
Taassuma Lars Løkke Rasmussenip qinersinermi kisitsinerup kingorna unnuap qeqqata kingorna sianersimanera oqaatigaa.
- Ippassaq sianerpoq. Qinersinerup inerneri ersereernerani sianerpoq, taanna oqarpoq.
Taanna talerperlernik talerperliinnarnillu naalakkersuisuutitaqalernissamut periarfisssarsiorsoraajuk?
- Eqqarsarpunga kikkut tamarmik periarfissanik assigiinngitsunik ujartuipput. Tamanna oqaatigisinnaavara, Aaja Chemnitz oqarpoq.
Mette Frederiksen ministeriunerulertussatut taperseraa
Aaja Chemnitzip Mette Frederiksen siammasissumik saamerliusunik naalakkersuisuutitaqarnermi ministeriunerulertussatut taperserpaa.
Inuit Ataqatigiit ileqquusoq malillugu naalakkersuisunik saamerlernik tapersiisarpoq.
Saamerliit qinersinerup inernerani 87-inik qinigaatitaqarput, nunanillu avannarlernit qinikkanit sisamanit pingasut Mette Frederiksen taperserpaat. Tassanilu IA ilaalluni.
Taamaalilluni saamerliit amerlanerussuteqalernissamut pisariaqartut 90-it qinigaatitaraat.
Talerperliit 72-inik qinigaatitaqarput, taakkulu savalimmiuni folketingimut ilaasortamit ataatsimit taperserneqarput, Løkkellu qinigaatitai 16-it tapersiissagunik 89-inik qinigaatitaqalissapput.
IA-p tapersiineratigut taamaalillutik qinikkat 90-iulersinnaagaluarput.
- Talerperliinnarnik IA-p tapersiinissaa takorloorsinnaanngilara. Kisianni qinigaatitatta saamerliinnaavinnut tapersiinissaa oqaatigereersinnaanngilara, Chemnitz oqarpoq.
- Isumaqatigiinniarnerit apeqqutaassapput, IA-p piumasaqaataanut tusaaniartoqarnerussasoq qulakkeertariaqarparput.
Løkke Høegh-Damimut sianinngitsoq
IA-mit Aaja Chemnitz aamma Siumumit Aki-Matilda Høegh-Dam qinigaaqqipput, taamaammallu ukiuni sisamani Folketingimeeqqissallutik. Savalimmiuni Socialdemokraatit suleqatigisartagaanit Javnaðarflokkurinimit Sjúrður Skaale aamma qinigaaqqippoq.
Savalimmiuni Sambandspartimit Anna Falkenberg Folketingimi nutaajuvoq. Taassuma Jakob Ellemann-Jensen ministeriunerusussatut taperserpaa.
Ritzau-ip Sjúrður Skaale aamma attaveqarfigaa, taassuma Lars Løkke Rasmussenimit attavigineqarsimanerluni akissuteqarfigiumanngilaa.
Siumumit Aki-Matilda Høegh-Dam Lars Løkke Rasmussenimit attaveqarfigineqarsimannginnerarpoq.
Ritzau-ip Lars Løkke Rasmussen aamma oqaaseqartinniarsaraa.