Taasinerit tamarmik kisinneqareerput – nunarpullu pingaarutilimmik inississinnaavoq
Danmarkimi qinersisut tamarmik maanna kisinneqarput.
Danskillu qinersineranni inernerit ersarilluanngillat:
Saamerliit 87-inik qinigaatitaqarput.
Talerperliit 73-inik qinigaatitaqarput.
Tassa imaappoq taakku arlaannaalluunniit 90-inik qinigaatitaqanngillaq – taamaalillutillu tamarmik amerlanerussuteqalersinnaanatik.
Tamatumalu nunanit avannarlerni qinersinernut soqutiginarluinnarsitsilersinnaapput. Nunarpummi Folketingimut marlunnik qinigaqartussaavoq, ilimagineqartutullu tamanna inerneqassaguni Siumut Inuit Ataqatigiillu Folketingimiittuuteqaleqqissapput. Taakkulu tamarmik saamerlerneersumik ministeriunerulertussamik tapersiiniarput.
Nunatsinneersut Savalimmiuneersorlu ilanngullugit amerlanerussuteqarsinnaasut
Taamaalillutillu saamerliit Mette Frederiksenip kissaatitigaatut amerlnaerussuteqarnissamut naammalerlutik 90-inik qinigaatitaqalissapput.
- Taamaassappat, savalimmiormiusoq socialdemokratiusoq, nunatsinni socialdemokratiusoq nunatsinniillu aappaa aalajangiisunngoratarsinnaavoq, Inuit Ataqatigiinniit folketingimut ilaasortaasimasoq Sara Olsvig KNR-imut oqarpoq.
AAMMA ATUARUK Isumasiuineq: Partiit saamerliit talerperliilluunniit amerlanerussuteqanngillat
Savalimmiormiut Folketingimut ippassarli qinersereerput – tassanilu Anna Falkenberg Sambanspartimeersoq aamma Sjúrður Skaale Javnaðarflokkurinimeersoq qinigaapput. Anna Falkenberg talerperlerneersumik ministeriuneqarniarpoq - Sjúrður Skaalellu Mette Frederiksen taperserlugu.
- Nunatsinnit Savalimmiuninngaanniillu ilaasortat assorujussuaq pingaarutilimmik inisseriaannaapput. Partiit qineqqusaartitsisut piareersimaffigigaat neriuppunga, Lars-Emil Johansen Siumumeersoq Folketingimut ilaasortaasimasoq KNR-imut oqarpoq.
Naalakkersuisoqatigiit siammasissut
Mette Frederiksen qinersinissamik suaaruteqarnermini qinigaaffimmi matumani siammasissunik naalakkersuisoqatigiiliornissaq oqaatigaa. Tamannalu suli kissaatigiguniuk Lars Løkke Rasmussenip partiia nutaaq Moderaterne tikkuunneqarpoq. Modernaterne 16-inik qinigaatitaqarput - Mette Frederiksenilu siammasissumik naalakkersuisuutitaqarniaruni nunanit avannarlernit qinikkat ilannguttariaqanngilai.
Nunatsinni qinersiviit nalunaaqutaq 20.00 matupput, qinersinerullu inerneri unnuap-qeqqata missaani naammassinissaat ilimanarpoq.
