Isumasiuineq: Partiit saamerliit talerperliilluunniit amerlanerussuteqanngillat
Partiit saamerliit 85-inik qinigaatitaqassangapput.
Partiit talerperliit 73-inik qinigaatitaqassangapput.
Taakku akornanni Lars Løkkep partiia Moderaterne 17-inik qinigaatitaqassangavoq.
Tamanna DR-ip saqqummersitaata exitpollip takutippaa.
DR-ip isumasiuinera exitpoll naapertorlugu partiit saamerliit talerperliilluunniit amerlanerussuteqanngillat. Amerlanerussuteqarnissamummi 90-inik qinigaatitaqarnissaq pisariaqarpoq.
Maannakkutut isikkoqartillugu partiit saamerliit talerperliilluunniit Moderaterinik ilaqarnatik amerlanerussuteqarsinnaanngillat.
Lars Løkke ministerinngorsinnaassasoq
TV2 assingusumik aamma isumasiuivoq. Tassannga partiit saamerliit 86-inik talerperliillu 72-inik qinigaatitaqassangatinneqartut takutinneqarpoq.
TV2-p isumasiuinera aamma naapertorlugu Moderaterne 17-inik qinigaatitaqassangapput.
Qinersivinni isumasiuinerit qinersisartut qinersiviit eqqaanniittut kikkunnik qinersisimanerminnik paasissutissiinerat tunuliaqutaralugu suliarineqarput.
Taamaalilluni qinersivinni isumasiuinerit qaammatini kingullerni isumasiuinerni Lars Løkkep ministeriusinnaanissaanik qulakkeerinissamut takutitsisut malippai.
AAMMA ATUARUK Hans Enoksen qinigaassaguni Folketingemi ilaasortaaniarpoq
Isumasiuinerit taamaaginnassappata Lars Løkkep kissaatigiguniuk partiit saamerliit amerlanerussuteqaqatigilersinnaavai.
Taassumali partiit talerperliit aamma toqqarsinnaavai - kisianni partiit talerperliit suli amerlanerussuteqarnavianngillat.
Nunarput politikerinik marlunnik Folketingimut aallartitaqartussaapput, taakkulu marluk Mette Frederiksenip ministeriunerulernissaanik tapersiinissaat naatsorsuutigineqarpoq.
Savalimmiormiut marlunnik qinigaasoqareerput - taakku aappaata partiinit talerperlinnik ministeriuneqarnissaa taperserpaa aappaalu saamerlerneersumik tapersiilluni.
Radikalit affaannanngortut
Det Radikale Venstre qinersinissamik aasaq manna aallartitsisut kinguariangaatsiartut, DR-ip exitpolliata takutippaa.
Partii taanna qinersisut 4,7 procentiinit taaguunneqartussanngatinneqarpoq. Tassa imaappoq arfineq-pingasunik qinigaatitaqassasut, taamaalillutillu qinigaaffimmi kingullermut sanilliullugu affaanik ikinnerulissallutik, kingullermik qinersinermi 8,6 procentiinit taaguunneqaramik 16-inik qinigaatitaqarput.
DR-ip exitpollia danskit 4.000-it ullumikkut qinersisut tunuliaqutaralugit suliarineqarpoq.