Hans Enoksen qinigaassaguni Folketingemi ilaasortaaniarpoq

Hans Enoksen Folketingimut qinigaassaguni, politikikkut pingasunik qinigaaffeqalissaaq. Qinigaaffigeriikkanili marluk iperassanerlugit oqaaseqarfigerusunngilaa, matumanili Folketingimi ilaasortaaneq pineqanngilaq.
Hans Enoksen Folketingimut qinigaassagaluaruni ulapittorujussuussaaq. Ullumikkummi aamma Inatsisartuni Qeqqatalu Kommuniani qinikkatut aamma issiaveqarpoq. Assi © : KNR / Malik Brøns
Allattoq Karline Platou, Mads Malik Fuglsang Holm
novembarip 01-at 2022 13:26

Akunnerni makkunanerpiaq kalaallit qinersisartuisa maanna kina Folketingimi sinniisorissanerlugu nalilersuleruttorpaat.

Anna Wangenheim Demokraatineersoq Hans Enoksenilu Naleqqameersoq taakkupputtaaq qinigaariaannaasut ilaat.

Taamaattoqassagaluarpalli, marluullutik pisuni immikkuullarissumi misigisaqassaqqooqaat, tassami tamarmik Inatsisartuni ilaasortaapput, tassungami qinigaaffitsik pigiinnassaneraat apeqqutaalluinnalissammat.  

Hans Enoksenimmi natsat teqqiallit pingasut atulissavai, tassami aamma Qeqqata Kommuniani kommunalbestyrelsemi ilaasortaavoq.

Taassumami Folketingimut qinigaassagaluaruni Folketingimi ilaasortaanissi toqqarusunnerullugu oqaatigaa.

- Partiip anguniagai aamma allat ingerlassinnaavaat, suleqataajuassaangali sukkulluunniit, imaanngilaq Hans Enokseni peerpat suliniutit tamarmik unitsinneqassasut, Hans Enoksen oqarpoq.

Anna Wangenheimilli qangali oqaatigereerpaa Folketingimut qinigaassagaluaruni Inatsisartuniit sulinngiffeqarallarnissi toqqassagini.

Allat suliarisinnaavaat

Hans Enoksen 2021-mi kommuninut qinersisoqarnerani Qeqqata Kommunianut 419-nik taaneqarluni iserpoq, taamatuttaaq Inatsisartunut qinersinermi 1.474-inik taaneqarluni iserpoq. Oqaatigerusunngilaali Folketingimut qinigaassagaluaruni qinigaaffigeriikkamini sulinngiffeqassanerluni, paasisinnaanerarpaali taakkunani qinersisini Folketingimut qinigaassagaluaruni pakatsisissinnaagamigit.

Tamannali Folketingimut qineqqusaarneranut aporfiunngilaq.

- Aap, uangarpiaq Inatsisartunut kommunimilu kommunalbestyrelsemut isernissara qinerpaat, taamaammat qularinngilara anguniakkat allat suleqataaffigissallugit, naak qinersisikka immaqa pakatsisinnaassagaluartut, Hans Enoksen oqarpoq.

Qinersisivit kisianni qinerpaatsit isumalluarfigigamitsit pakatsisissanngiligit?

- Uanga upperiuaannarpara uanga sapinngikkuma aamma allat sapinngitsut, taamaammanuna ilungersuuttarikka oqarlunga: ”Sapinngilasi sassartaarniaritsi”, Hans Enoksen oqarpoq.

Marloqiusanik qinigaaffeqarneq siusinnerusukkut pivoq, tamannalu pivoq 2018-imi Aleqa Hammond Nunatta Qitornai tunuliaqutaralugit Inatsisartuni Folketingimilu ilaasortaanerata nalaani.

Aamma atuaruk