Mette Frederiksenip Venstret Moderaatillu naalakkersuisooqatigilerai

Danmarkimi naalakkersuisooqatigiit sisamanngorpat kiisami saqqummiunneqassapput.

Nalakkersuisooqatigiit tassaalerput Socialdemokratit, Venstret aamma Moderaatit, statsministeriugallartoq Mette Frederiksen (S) ilisimatitsivoq. 

- Ataqqinartorsuaq Dronning Margrethe unnummut nalunaarfigaara taamaaliorniarluta. Naalakkersuisooqatigiit nutaat sisamanngorpat saqqummiunneqassapput, tassaassallutik Socialdemokratit, Venstret aamma Moderaatit, taanna oqarpoq.

AAMMA ATUARUK IA-p partii suleqatigisaa isuma-qatigiinniaqataajunnaaraluartoq Socialdemokratit suli taperserai

Nalakkersuisooqatigiit tunngavigisassaat tusagassiortunik pingasunngorpat katersortitsinermi saqqummiunneqassapput, naalakkersuisullu nutaat sisamanngorpat saqqummiunneqassallutik.

Partiit pingasut 89-inik qinigaatitaqalerput. Amerlanerussuteqassagaanni 90-inik ilaasortaatitaqartariaqarpoq -  Atlantikulli avannaanniit, tassa Kalaallit Nunaanniit Savalimmiuniillu qinikkani sisamaasuni pingasut partiinik arlalinnik peqateqarluni naalakersuisooqatigiiliortoqarnissaanik tapersersuiniarput. Taamaalilluni naalakkersuisunngortitsinissat taakkunannga taperserneqarunik amerlanerussuteqassallutik.  

- Naapeqatigissutigisassarpassuaqarpoq, pingaarnertulli angusaqarusussuseqarneq piuvoq, Mette Frederiksen oqarpoq.

Naalakkersuisunngortitsinissamut tunngaviusussat partiinit pingasuusunit isumaqatigiissutaasut suuneri suli oqaatigineqarsinnaanngikkallarpoq.

AAMMA ATUARUK Siumut naalakkersuisunut nutaanut: Kalaallit Nunaata imartaani isumannaallisaaneq pitsaanerusoq

Aaja Chemnitz Larsen (IA) tallimanngormat KNR-imut oqarpoq naalakkersuisoqatigiit Socialdemokratit, Venstret aamma Moderaatit taperserlugit. Naak IA-p partii suleqatigisaa SF ulloq sioqqullugu isumaqatiginniaqataajunnaaaraluartoq.  

-  SF-ilu politikkikkut pingaartitatta assinginik, tassa silap pissusianut, nukissiuutinut ataavartunut taavalu meeqqanut inuusuttunullu tunngasunik, pingaartitsisut suleqatiginiarpagut. Taakkua SF-ilu pingaartitaraavut, Folketingimili partiit allat taakkuninnga uagutsitulli pingaartitsipput, Aaja Chemnitz oqarpoq.

Folketingimut novembarip aallaqqaataani qinersivugut, tamatumalu kingornali ministeriunerugallartoq, Mette Frederiksen, taamanili nutaanik naalakkersuisoqatigiiliornissamut isumaqatiginninnialerpoq. Danmarkimi aatsaat taama sivisutigisumik naalakkersuisoqanngilaq.