Siumut naalakkersuisunut nutaanut: Kalaallit Nunaata imartaani isumannaallisaaneq pitsaanerusoq
Folketingimut ilaasortaq Siumumeersoq, Aki-Matilda Høegh-Dam nunanit avannarlernit qinikkat assigalugit Danmarkimi naalakkersuisunngortitsiniarluni misissuititamik, Mette Frederiksenimik (S) Marienborgimi isumaqatigiinniarnermi marlunngornermi ataatsimeeqateqarpoq.
Isumaqatigiinniarnermi tassa avatangiisit silallu pissusia oqaluuserineqarput.
Nunatta imartaa pillugu akisussaaffik naalagaaffimmiippoq, Danmarkilu silap pissusiata allanngoriartorneranut atatillugu nunatsinni immikkut ittumik suliassaqartoq, Aki-Matilda Høegh-Dam oqarpoq.
- Umiarsuit aqqutaat annertunerupput, takornariat amerlanerusut takusarpagut. Arlaannik pisoqassagaluarpat upalungaarsimasoqarluarnerussaaq. Tamannalu Danmarkip ilaatigut akisussaaffigaa.
AAMMA ATUARUK Mette Frederiksenip IA Siumullu silap pissusia avatangiisillu pillugit marlunngornermi oqaloqatigissagai
Aki-Matilda Høegh-Damip oqarnera naapertorlugu danskit oqartussaasui assersuutigalugu nunatta imartaani umiarsuarnik angisuunik ajutoortoqaraluarpat imaluuniit uuliakoortoqangaatsiaraluarpat naammattumik piareersimanngillat.
- Umiarsuaq takornariartaat nunnik tusintilinnik ilaasulik ajutuusagaluarpat suut piareerisimaffigissanerlugit erseqqissumik oqaatigineqarnisaa pisariaqartoq isumaqarpunga. Piarersimasoqarnersoq erseqqinngitsoq isumaqarpunga. Tamanna ersarissarneqartariarpoq, Aki-Matilde Høegh-Dam oqarpoq.
Folketingimut ilaasortap IA-meersup, Aaja Chemnitzip Mette Frederiksen marlunngornermi aamma ataatsimeeqatigaa.
Danmarkimi naalakkersuisunngortitsiniarluni isumaqatiginniarnerit sapaatit akunneri sisamassaanni ingerlanneqarput, novemberip ulluisa aallaqqaataanili qinerisisoqarmat, Mette Frederiksen partiit saamerliit minnerunngitsumillu Kalaallit Nunaannit Savalimmiuniillu ilaasortaatitat pisuttaallutik amerlanerussuteqaqqalaarput.
