Mette Frederiksenip IA Siumullu silap pissusia avatangiisillu pillugit marlunngornermi oqaloqatigissagai
Danskit politikerii Mette Frederiksenip (S) naalakkersuisunik nutaanik pilersitsinissamut isumaqatigiinniarnerani sapaatit akunnerisa sisamassaanni ataatsimiigiartaarput.
Nunanit avannarlernit qinikkat marlunngornermi qaaqquneqarput.
Inuit Ataqatigiinnit Aaja Chemnitzip nunatsinni pinngortitami ajunaarnersuaqarsinnaanera silallu pissusiata allanngoriartornera ukkatariniarpaa.
Inatsisartut ataatsimoorlutik silap pissusiata allanngoriartornera nunatta suani qanorlu sunniuteqarnersoq siunissamilu qanoq iliuuseqarfigineqarsinnaanersoq misissorneqarnissaat aappaagumut aningaasanut inatsisissamut 2026 tikillugu isumaqatigiissutigaat.
Danmarkilu suliami tamatumani suleqataasariaqartoq, IA-meersoq isumaqarpoq.
- Danmarkip misissueqqissaarnermut tassunga tapiissuteqarsinnaanersoq takussallugu pingaaruteqarpoq. Ataatsimoortumimmi tamanna pisariaqartinneqarpoq, tassa danskit oqartussaasuisa suliamut aaqqiissuteqarnissaq nalinginnaasumik aamma ilaaffigaat, Aaja Chemnitz KNR-imut oqarpoq.
- Danskit naalakkersuisuisa suliaq aallartereersoq pillugu ilisimatinnissaat kiisalu danskit naalakkersuisuisa misissueqqissaaqataalernissaat pingaaruteqarpoq, taanna oqarpoq.
AAMMA ATUARUK Siumup IA-llu Mette Frederiksen ataatsimeeqatigereerlugu partiinik allanik oqaloqateqartut
Nunanit avannarlernit qinikkat danskit naalakkersuisuisa isumaqatigiinniarneranut kingullermik ilaaneranit sapaatip akunnera ataaseq sinnerlugu qaangiuppoq.
Tamatuma kingorna Venstrep siulittaasuata, Jakob Ellemann-Jensenip partii Socialdemokraatillu isumaqatigiissinnaagunik naalakkersuisoqatigiilernissamut piareersimallutik oqaatiginikuuaa.
Folketignimut ilaasortap, Aki-Matilda Høegh-Damip Siumumeersup Mette Frederiksen marlunngornermi oqaloqatiginissaanut sunik oqaluuserisaqarusunnersoq pillugu oqaaseqartinniarnera iluatsinngilaq.
