APP-i nutaaq atorlugu piniartut ilisimasaat atortorissaarutinut nutaalianut atassuserneqartut
Arctic Eidir Societyp app-i nutaaq Hudsonip kangerliumarngani Sanikiluaap qeqertaani sapaatip akunnerani matumani saqqummersippaat.
CBC news naapertorlugu peqatigiiffimmi pisortap, Joel Heathip naggueqatigiit inuit utoqqartaat ilisimasatoqqaminnik inuusuttunut ingerlatitseqqikkusunnerat app-imik ineriartortitsinermut pissutaavoq.
App-imi Hudsonip kangerliumarngani sikup qanoq innera, sikumi angallannerup ulorianarnera silallu qanoq innera pillugu paasissutissaqarnera pissutigalugu app-i Siku-mik ateqarpoq.
App-i paasissutissarpassuarnik katersuisoq
Siku app-imi allarpassuarnik nassaassaqarpoq, piniartut oqaluttuatoqaat, uumasut, nunap assingi, qaammataasatigut assilisat sikup sumi saaliartorneranik takussutissiisut kiisalu sumiiffiit uumasullu pillugit ilisimasatoqqat assimi nassaassaapput.
App-imi oqaatsit tuluttut saniatigut piniartut ilitsoqqussaralugu oqaasii tassa Inuktitut atorneqarput.
Sanikiluaap eqqaani mitit paasissutissiissutiginissaat illersornissaallu The Arctic Eider Societyp pilersinneqarneranut aallarniutaapput. Peqatigiiffik naggueqatigiit inuit atassuteqarnerat aamma Sanikiluaami mitit pillugit filmikkut nersornaaserneqarsimasukkut, People of a Featherikkut ilaatigut paasissutissiivoq.
App-i atortorissaarutini assigiinngitsuni soorlu Androidini IOS-inilu atorneqarsinnaavoq.
Aamma videoliaq nittartakkani Arcticeider.com-imi imalunniit www.siku.org-mi takuneqarsinnavoq.
