Nuummiit timmisartumik aqaguutinnagu qangattartoqassanngitsoq

Nuummi Nuummullu timmisartumik ullumikkut angalasoqassanngilaq.

Air Greenland nittartakkamini allappoq. Sermitsiap allaaserisaa naapertorlugu timmisartup mittarfiani itersaqarpoq, taannalu suliarineqaleruttorpoq.

Timmisartup missaa siusinnerpaamik aqagu ullaakkut arfinernut timmisartumit qangattarfigineqarsinnaasoq, Air Greenland nalunaarpoq.

”Angalasussat eqqugaasut tamarmik angalanissamut pilersaarummik nutaamik unnugu nalunaaqutaq qulingiluanngortinnagu nassinneqarumaarput”, timmisartuutileqatigiiffik nittartakkamini nalunaarpoq.

Itersaq silarlunneranit ajornerulersinneqatoq

Mikkel Lund timmisartup mittarfianut akisussaasumi Greenland Airportsimi attaveqaqatigiinermut pisortaavoq. Piffissap ingerlanerani navianartorsiortoqarsimanngitsoq, taanna erseqqissaatigaa.

- Timmisartup mittarfiani itersamininnguaq ulluni kingullerni anorersuarlunilu siallerneranit ajornarnerulaalerpoq. Taamaammat mittarfiup matunissaa pisariaqalerluni. Timmisartup isumannaannerunissaa pissutigalugu annertunerulaartumik iluarsaassiniarluta maanna aalajangerpugut, taanna KNR-imut oqarpoq.

- Itersaqalaarnera maanna ajoqutaavoq. Tamanna aqqusinerni mittarfinnilu - sanaartorneqaqqammersumi qaqutigoortuunngilaq – tassa asfalterisoqaraangat ataaniittoq nikililaarluni inissittarpoq. Tassunga pissutaasut arlaqarsinnaapput, taannalu misissorluarneqassaaq.

Isumannaassuseq siulliussasoq

Timmisartumit unnugu qangattartoqarsinnaassasoq ullumi siusinnerusumi nalunaarutigineqaraluarpoq. Air Greenlandilli nalunaaqutaq marluk qaangilaaraa taamaattoqarsinnaanngitsoq nalunaaruteqarpoq. Tamanna timmisartup miffissaani asfaltimik nutaamik pissuteqarpoq.

- Asfalti iluarsaassarput sila pissutigalugu iluamik issunngilaq. Taamaammat peqqissaartumik suliarineqarnissaa qulakkeerniarlugu maanna peqqissaartumik aamma annerulaartumik itinerulaartumillu ullup sinnera suliaqassaagut. Kisianni isumannaassuseq salliullugu suliaqaruaannarpugut, Mikkel Lund oqarpoq.